Feeds:
பதிவுகள்
பின்னூட்டங்கள்

Archive for மார்ச், 2012


திருவெளிப்பாடு கண்ட எல்லாச் சமயங்களையும் போல, ஆன்மப்பயிற்சிக்கு இன்றியமையாத மதிப்பினைக் கொண்டதாக உண்ணா நோன்பைப் பஹாய் சமயம் காண்கிறது. ஒவ்வொரு வருடமும் முதிய பஹாய்கள் சூர்யோதயத்திலிருந்து சூர்ய அஸ்தமனம் வரை ஒவ்வொரு நாளும் உண்ணா நோன்பிருந்திட பத்தொன்பது நாள்களை பஹாவுல்லா விதித்திருக்கின்றார். பஹாய் வருடம் 365 அல்லது 366 நாள்களைக் கொண்டதாயினும், அதற்கு பத்தொன்பது மாதங்கள் உள்ளன. ஒவ்வொரு மாதத்திற்கும் கடவுளின் நற்பண்பு ஒன்றே பெயராகச் சூட்டப்பட்டுள்ளது. உலகில் உள்ள பஹாய்கள் அனைவரும் மார்ச் மாதம் 2ம் நாளில் ஆரம்பித்து அதே மாதம் 20ம் தேதி வரை பஹாய் வருடத்தின் கடைசி மாதமாகிய ‘அலா’ அல்லது ‘உயர்வு’ மாதத்தில் உண்ணாநோன்பைக் கடைப்பிடிக்கின்றனர். மார்ச் மாதம் 21ம் திகதி பஹாய் வருடப்பிறப்பாகும். இவ்வருடப் பிறப்பு மஹாவிஷுவதினமாகிய (vernal equinox) இளவேனிற்காலத்தின் முதல் நாளில் உண்டாகின்றது. ஆகவே, பஹாய்களின் உண்ணா நோன்பு பிறக்கப்போகும் வருடம் முழுவதற்குமான ஆன்மீகத் தயார்நிலை மற்றும் புத்துயிர் பெறுதலாகக் காணப்படும். கர்ப்பமாக இருக்கும் பெண்கள், தாய்ப்பால் ஊட்டும் தாய்மார்கள், எழுபது வயதுக்கும் மேற்பட்டவர்கள், நோயுற்றவர்கள், பயணங்களில் ஈடுபட்டுள்ளோர், கடின உடலுழைப்பில் ஈடுபட்டுள்ளோர், பதினைந்து வயதுக்கும் குறைந்த சிறுவர்கள் உண்ணா நோன்பைக் கடைப்பிடிப்பதிலிருந்து விலக்களிக்கப்பட்டுள்ளனர்.

பத்தொன்பது நாள்கள் கொண்ட இந்த நோன்புக் காலம் ஒவ்வொரு வருடமும் மார்ச் மாதம் இரண்டாம் நாள் ஆரம்பித்து அதே மாதம் 20ம் நாளில் முடிவுறும். இந்த நாள்களின் போது சூர்யோதயத்திலிருந்து சூர்ய அஸ்தமனம் வரை பஹாய்கள் எவ்வித உணவோ பானமோ அறவே அருந்தாமல் இருப்பர். அடிப்படையில் இந்த நாள்கள், தியானம், பிரார்த்தனை, ஆன்மீகப் புத்துயிர்ப் பெறுதல் ஆகியவற்றில் ஈடுபட்டும் தங்களின் அகவாழ்விற்குத் தேவையான மாற்றங்களை ஏற்படுத்திக்கொண்டும், தங்களின் ஆன்மாவில் இயல்பாகவே குடிகொண்டிருக்கும் ஆன்மீக ஆற்றல்களுக்குப் புத்துணர்ச்சியும் புத்துயிரும் தரும் காரியங்களில் ஈடுபடுவர். ஆகவே, உண்ணா நோன்பின் தனிச்சிறப்பும் நோக்கமும் ஆன்மீகத்தையே அடிப்படை அம்சமாகக் கொண்டுள்ளன. உண்ணா நோன்பு ஓர் அடையாளக் குறியும் அது தன்னலமும் உடலிச்சைகளிலிருந்தும் விடுபட்டிருக்கவேண்டும் என்பதற்கான ஓர் நினைவூட்டலும் ஆகும்.

உண்ணா நோன்பு மனிதனுள் விழிப்புணர்வுக்குக் காரணமாக இருக்கின்றது. மனித இதயம் மென்மைபெற்றும் அவனது ஆன்மீகம் அதிகரிக்கவும் செய்கின்றது. இது மனிதனின் எண்ணங்கள் கடவுளை நினைவுகூறுதலில் ஈடுபட்டிருப்பதாலும், இந்த விழிப்புணர்வு மற்றும் தூண்டுதலின் வாயிலாகத் தக்க மேம்பாடுகள் நிச்சயமாக வந்தடையும்… உண்ணா நோன்பு லௌகீகம் மற்றும் ஆன்மீகம் என இருவகைப்படும். லௌகீக நோன்பு என்பது உடலிச்சைகள் மற்றும் உடல் தேவைகளைத் தவிர்த்திருப்பது. ஆனால் தக்கதான ஆன்மீக நோன்பு என்பது மனிதன் தன்னல இச்சகைளிலிருந்தும், கருத்தின்மையிலிருந்தும், பைசாச மிருக குணங்களிலிருந்தும் விடுபட்டிருப்பது என்பதாகும். ஆகவே, லௌகீக உண்ணா நோன்பென்பது ஆன்மீக நோன்பிற்கான ஓர் அடையாளமே ஆகும். அதாவது: ‘கடவுளே! நான் உடலிச்சைகளிலிருந்து நோன்பு நோற்றும் உண்பதிலும் அருந்துதலிலும் ஈடுபடாமல் இருப்பதனால், அதே போன்று என் இதயத்தையும் வாழ்வையும் உமது அன்பைத் தவிர மற்றெல்லாவற்றிலிருந்தும் தூய்மைத்படுத்தவும் புனிதப்படுத்தவும், என் ஆன்மாவை சுய இச்சைகளிலிருந்து பாதுகாக்கவும் பதனப்படுத்தவும் செய்வீராக… இவ்வகையாக ஆன்மா புனிதமெனும் நறுமனங்களின்பால் தொடர்புகொண்டு உம்மை நினைவுகூறுதலைத் தவிர மற்றெல்லாவற்றிலிருந்தும் நோன்பு நோற்றிருக்குமாக.’

Advertisements

Read Full Post »