Feeds:
பதிவுகள்
பின்னூட்டங்கள்

வள்ளலார் வரலாறு, ஒரு பஹாய் கண்ணோட்டம்

பஹாவுல்லா அருளிய ஹிக்மத் நிருபத்தில் அவர் கூறுவதாவது:

“ஒவ்வொரு நாட்டுக்கும் ஒரு பங்கு விதித்துள்ளோம், ஒவ்வொரு விசேஷத்திற்கும் எமது பகிர்ந்தளிக்கப்பட்ட பகுதி, ஒவ்வொரு கூற்றுக்கும் எமதுவிதிக்கப்பட்ட நேரம் …ஒவ்வொரு சூழ்நிலைக்கும் ஒரு தகுந்த கருத்து”

மேலும் …

“ஒவ்வொரு மண்ணிலும் ஓர் அறிவொளியை நிர்மாணித்துள்ளோம், முன் விதிக்கப்பட்ட நேரம் நேரிடும் போது, எல்லாம் அறிந்தவரும் சர்வ ஞானியுமான இறைவன் ஆணையால் அது அதன்கீழ்வானத்திற்கு மேல் பிரகாசிக்கும்”.

இதே விஷயத்தை கடந்த கால சமயங்களில்:

“அவர் நாளில் இவ்வுலகில், ஒவ்வொரு சமயத்திலும், ஒவ்வொரு மக்களிலும், ஒவ்வொருமொழியிலும், ஒவ்வொரு இனத்திலும், ஒவ்வொரு நாட்டிலும் புனித ஆன்மாக்கள் தோற்றுவிக்கப்படுவார்கள்”

எனக் கூறப்பட்டுள்ளது.

வள்ளலாரின் கையெழுத்து

இறைவனின் சமயம் இப்பூமியில் தோன்றும் ஒவ்வொரு காலக்கட்டத்திலும் மேற்குறிப்பிட்ட அறிவொளிகள் இப்பூமியில் உதித்திடக் காணலாம். உதாரணமாக சைவசமய குறவர் நால்வருள் திருஞானசம்பந்தர் திருநாவுக்கரசர், மற்றும் சுந்தரமூர்த்தி ஆகியோர் தோன்றிய ஏழாவது நூற்றாண்டு இப்பூமியில் இஸ்லாம் சமயம் ஒளிவிட ஆரம்பித்த காலகட்டம் என உணரலாம். இவ்வாறே பஹாய்சமயம் தோன்றிய காலகட்டத்தில் இந்தியாவில் தோன்றிய அறிவொளிகள் பலருள் வள்ளலார் ராமலிங்க பிள்ளையவர்களும் ஒருவராவார்.

வள்ளலார் பெயரை அறிந்த அளவு மக்கள் அவர் போதனைகள் அறிவார்களா என்பதுசந்தேகமே. அவரை ஒரு சீர்திருத்தவாதியாகவும், புரட்சியாளராகவும் கண்டனர் . ஆனால் இப்பூமியில் அவர் தோன்றிய உண்மையான நோக்கத்தை அந்நேரமும் சரி இந்நேரமும் சரி புறிந்தவர்கள் வெகு சிலரே. பஹாய்களின் கருத்து யாதெனில், அவர் தமிழ் நாட்டில் தோன்றியதன் முக்கிய நோக்கம், “அருட்பெருஞ்சோதி” என்னும் நாமத்திற்கு உரிய கடவுள் அவதாரமான ஒருவரின் வருகைக்காக மக்களைத் தயார் செய்வதே என்பதாகும்.

ஒரு வகையில் “அருட்பெருஞ்சோதி” என்னும் திருநாமம் வள்ளலார் இறைவனுக்கு அளித்த வேறொரு பெயரைப்போல் தோன்றினாலும், ஆழ்ந்து பார்க்கும் போது அது தனித்த ஓர் கடவுளின் அவதாரத்தை குறிக்கின்றது என்பதைக் காணலாம். ஆனாலும் மற்ற அவதாரங்களைப் போல் இல்லாமல் இறைவனே இப்பூமிக்கு வருகையளிப்பதைப் போலும் வள்ளலார் குறிப்பிடுகிறார்.

சாதியிலே மதங்களிலே சமயநெறி களிலே
சாத்திரச்சந் தடிகளிலே கோத்திரச்சண் டையிலே
ஆதியிலே யபிமானித் தலைகின்ற வுலகீர்
அலைந்தலைந்து வீணேநீ ரழிதலழ கலவே
நீதியிலே சன்மார்க்க நிலைதனிலே
நிருத்த மிடும்தனித்தலைவ ரொருத்தரவர் தாமே
வீதியிலே அருட்சோதி விளையாடல் புரிய
மேவுகின்ற தருணமிது கூவுகின்றே னுமையே.

இப்பாடலிலிருந்து இவ்வுலகில் ஏதோ மிகவும் விசேஷமான நிகழ்வு ஒன்று நடைபெறப்போவதை வள்ளலார் முன்கூறுவதை நம்மால் உணர முடிகின்றது.

வள்ளலார் பிறந்த வீடு – மருதூர்

பள்ளிச் செல்லா வள்ளலார் தமிழ் மொழியிலும் வடமொழியிலும் புலமைப் பெற்றரவராய்த் திகழ்ந்ததோடு ஹிந்து சமய, முக்கியமாக சைவ சமய வித்தகராகவும் விளங்கினார். அவர் போதனைகளைக் கண்ணுறுபவர்கள் அவற்றில் “அனைத்துலக சகோதரத்துவம், இறந்தோர் உயிர்பெறுதல், ஆண் பெண் சமத்துவம்” போன்ற கோட்பாடுகளைக் காணலாம். இவை சாதி சமய வித்தியாசங்களால் பீடிக்கப் பட்ட, பெண் என்பவள் ஆணுக்கு அடிமை, அதற்கு மேல் கனவனே கண்கண்ட தெய்வம் எனவும் நம்பிய ஒரு சமூகத்துக்குப் போதிக்கப்பட்டவையாகும். இதற்கும் மேற்பட்டு கணக்கிலடங்கா போதனைகளை வள்ளலார் வழங்கியுள்ளார். இவரால் போதிக்கப்பட்ட சமூகமானது அவர்களின் கண்முன்னே இராமலிங்கர் இருந்தும் அவர் வாழ்ந்த காலத்தின் உண்மையை, அவரது மகிமையை, அறிவதில் அவரை விட்டு வெகு தூரத்தில்தான் இருந்தனர்.

இளமைக் காலம்

வள்ளலார் 1823ம் ஆண்டு அக்டோபர் 5ம் தேதி ஒரு சாதாரண குடும்பத்தில் பிறந்தவராவார். பிறந்த ஊர் தென் ஆர்க்காட்டைச் சேர்ந்த மருதூர். அவர் தகப்பனார் பெயர் ராமையா பிள்ளை, அம்மா சின்னமாள். சின்னம்மாள் ராமையா பிள்ளைக்கு ஆறாவது மனைவியாவார் மற்ற ஐந்து மனைவியரும் பிள்ளைச் செல்வம் இல்லாமலேயே இறந்தனர்.

இராமலிங்கர் பிறப்பதற்கு முன் ஒரு நாள் உணவு கேட்டு வந்த சிவனடியார் ஒருவர் பசியாறிய பின், சின்னம்மாளிடம் “எம் பசி போக்கினை, உலகத்தோர் பசி போக்கவும் ஞான வழிகாட்டவும் பிள்ளை ஒருவன் பிறப்பான்” எனக் கூறிச் சென்றார்.

இராமலிங்கர் கைக்குழந்தையாக இருந்த போது சிதம்பரம் கோயில் தரிசனத்திற்கு அழைத்துச் சென்றனர் பெற்றோர் . பிரஹாரங்களாகச் சுற்றி வந்து சிதம்பர ரகசியம் முன் நின்றனர். அப்போது குழந்தை இராமலிங்கர் வாய்விட்டுச் சிரித்தார். இதைக் கண்ட தீட்சிதர் குழந்தைக்கு இறைவன் காட்சியளித்தான் எனக் கூறியதாக வழக்கம் ஒன்று உண்டு.

தமிழ் நாட்டில் சிதம்பரம் சிவன் கோயில் மிகவும் முக்கியமானது. பல பாடல்கள் பெற்ற தலம். முக்கியமாக பதாஞ்சலி போன்றோரால் பாடப்பெற்ற தலம். இக்கட்டுரைக்கு மிகவும் நெருக்கமானதனால் அக்கோவிலைப் பற்றி சிறிது அறிந்து கொள்வது முக்கியம்.

சிதம்பரம் சிவன் கோவில்.

முற்காலத்தில் பொண்ணால் வேயப்பட்ட சிதம்பரம் கோவிலின் கூரை ஒன்று

இங்கு தமிழகக் கோயில்களில் சிதம்பரம் சிவன் கோயிலே பழமையானதும் முதன்மையானதும் ஆகும். சோழ மன்னர்களுள் ஒருவரான பராந்தக சோழன் இக்கோவிலுக்கு பொற்கூறை வேய்ததாக சரித்திரம் கூறுகிறது. இக்கோயில் சிறு செங்கற் கோயிலாக இருந்து பின்னாளில் கருங்கற் கோயிலானது. திருமுறைகள் ஓதும்போது சைவ சமயத்தைச் சார்ந்தவர்கள் “திருச்சிற்றம்பலம்” என்று தொடங்கி அதே விதமாக முடிப்பார்கள். திருமுறைகளை எழுதும்போதும் அதே விதமாக எழுதுவதும் பழக்கம். அதேபோன்று, இராமலிங்கரும் தமது படைப்புகளில் இதே வார்த்தையை முன் வைத்து எழுதக் காணலாம். இறைவன் இங்கு உருவம், அருவம் , அருவுருவம் என மூன்று வகையாக வழிபடப்படுவது இக்கோயிலின் முக்கிய சிறப்பாகும். உருவமாக நடராஜரும், அருவமாக “சிதம்பர ரகசியம்” எனவும், அருவுருவமாக லிங்க ரூபமாகவும் வழிபாடு நடக்கும். மற்றுமொரு சிறப்பெனப்படுவது கோவிந்தராஜர் சிலையும், அதாவது வைஷ்ணவ சமயக்கடவுளுக்கும், இங்கு இடமளித்திருப்பதாகும். சைவ சமய மறைகளான திருமுறைகளின் மூல ஏடுகள் பல நூற்றாண்டுகள் இக்கோவிலிலேயே வைக்கப்பட்டிருந்ததெனவும் சில ஆராய்ச்சியாளர்கள் கூறுகின்றனர். வள்ளலார் இக்கோவிலுக்கு ஈர்க்கப்பட்டதன் காரணத்தை விளக்கவே இவ்விஷயங்கள் இங்கு குறிப்பிடப்படுகின்றன.

இராமலிங்கர் ஆறு மாதக் குழந்தையாக இருக்கும் போதே தமது தந்தையை இழந்துவிடுகின்றார். தாயார் சின்னம்மாள் குடும்பத்தைப் பொன்னேரி என்னும் தமது பிறந்த ஊருக்கு அழைத்துச் சென்று பிறகு சிறிது நாட்களில் சென்னை நகருக்குக் குடிபெயர்ந்தார். தகப்பனை இழந்த குடும்பத்தை அண்ணன் சபாபதி பிள்ளையே பொறுப்பேற்று நடத்தி வந்தார். சபாபதி புராண சொற்பொழிவு ஆற்றுவதில் வல்லவர். அதனாற் கிடைத்த வருவாயே குடும்பத்தை நடத்த ஏதுவாயிருந்தது. ராமலிங்கருக்கு ஐந்து வயதான போது பள்ளிக்கு அனுப்ப முயன்றார் தமையனார். ஆனால் சிறுவராயிருந்த ராமலிங்கரின் நாட்டம் பள்ளிப் படிப்பில் அல்லாது கோயில் குளங்களைச் சுற்றி வருவதிலேயே இருந்தது. தமையனார் பாடம் போதித்த போதெல்லாம் அவர் கவனமெல்லாம் எங்கோ வெகு தொலைவில் இருந்தது. தமையனார் படிக்கச் சொன்ன பாடங்களை விட்டு வேறு புத்தகங்கள் அதுவும் நினைத்த போதுதான் படிப்பார். அதனால் மிகவும் கவலையுற்ற சபாபதி தம் மனைவியை அழைத்து தம் பேச்சைக் கேட்டாலொழிய தம்பிக்கு சாப்பாடு போட வேண்டாமென்றார். அதை மீறினால் இருவருமே வீட்டைவிட்டு வெளியே போகலாமெனவும் கூறிவிட்டார். அண்ணியோ கணவருக்குத் தெரியாமல் ராமலிங்கருக்குத் தினமும் உணவளித்து வந்தார்.

இவ்விதமாகப் பல நாள் சென்று ஒரு நாள் வீட்டில் நடந்த எதோவொரு விருந்தின் போது யார் யாரோ வந்து உணவருந்திச் செல்கின்றனரே ஆனால் தம் மைத்துனர் திருடனைப்போல் வந்து சாப்பிட்டுச் செல்கின்றாரே என ராமலிங்கரின் அண்ணியார் மிகவும் மனம் வருந்தி கண்ணீர் சிந்தினார். திருட்டுத்தனமாக உணவருந்த வந்த ராமலிங்கர் அதைக் கண்ணுற்று மனம் மிகவும் வருந்தியவராக, அண்ணியாரின் விருப்பம் என்னவென வினவினார். உன் தமையனார் விருப்பம் போல் கல்வி கற்று நீ தேற வேண்டும் என்று அவர் கூறினார். அதற்கு சரி என ஒப்புக்கொண்டார் ராமலிங்கர்.

(தொடரும்…)



22 ஜூலை 2021


BIC GENEVA, (BWNS) – சமீபத்திய மாதங்களில், ஈரானிய அரசாங்கத்தின் பல தசாப்தங்களான ஈரான் பஹாய்களுக்கு எதிரான அவதூறு பேச்சு மற்றும் பிரச்சாரம் புதிய மட்டங்களை எட்டியுள்ளது, இது அதிநவீனத்துவம் மற்றும் அளவு இரண்டிலும் அதிகரித்து வருகிறது. பஹாய் சமூகத்தை தீயவர்களாக்குவதற்கான விரிவாக்க மூல உபாயம் நூற்றுக்கணக்கான வலைத்தளங்கள், இன்ஸ்டாகிராம் கணக்குகள், டெலிகிராம் சேனல்கள் மற்றும் கிளப்ஹவுஸ் அறைகள் ஆகியவற்றின் வளர்ந்து வரும் மற்றும் ஒருங்கிணைந்த வலையமைப்பில் பிரதிபலிக்கப்படுகின்றது.

ஜெனீவாவில் உள்ள ஐக்கிய நாடுகள் சபையின் பஹாய் சர்வதேச சமூகத்தின் (BIC) பிரதிநிதி டயான் அலாய் கூறுகையில், “அவதூற்று பேச்சால் தூண்டப்பட்ட கடுமையான குற்றங்கள் மூலம் பாதிக்கப்பட்டோரினால் வரலாறு நிரம்பியுள்ளது. “பஹாய்களைக் குறிவைத்து தவறான தகவல்களின் பரவலானது அவர்களுக்கு எதிராக நடத்தப்படும் துன்புறுத்தல்களில் கடுமையான அதிகரிப்புக்கு ஒரு சமிக்ஞையாக இருக்கக்கூடும் என நாங்கள் அஞ்சுகிறோம்.”

நேற்று BIC வெளியிட்ட ஒரு வீடியோ, ஈரான் பஹாய்களுக்கு எதிரான துன்புறுத்தல்கள் மீதான உலகளாவிய எதிர்ப்புக்குரலில் மக்களை சேர்ந்துகொள்ளும்படி அழைக்கின்றது.

அரசாங்க அதிகாரிகள், மனித உரிமை ஆர்வலர்கள், மதப் பிரமுகர்கள் மற்றும் பிற முக்கிய நபர்கள் அரசு நிதியுதவி அளிக்கும் பஹாய் எதிர்ப்புப் பிரச்சாரத்தை தீவிரப்படுத்துவது குறித்து எச்சரிக்கை எழுப்புகின்றனர். ஏனெனில், மனித உரிமைகளின் வெளிப்படையான மீறல்கள் பெரும்பாலும் வெறுப்பூட்டும் மற்றும் தவறான தகவல்களின் சூழலில்தான் நடைபெறுகின்றன என்பதை வரலாறு சுட்டிகாட்டுகிறது.

கனேடிய நாடாளுமன்ற உறுப்பினர் கெர்ரி டியோட்டே இவ்வாறு கூறுகிறார்: “உலகில், ஈரான் நாட்டு பஹாய் சமயத்தினர் துன்புறுத்தப்படுவதைப் பற்றி அக்கறை கொண்ட பலரின் குரலோசையில் நான் என் குரலையும் சேர்த்திட விரும்பினேன். மத சுதந்திரம் என்பது நாகரிகத்தின் மிக அடிப்படையான அம்சங்களில் ஒன்றாகும். பஹாய்கள் மீதான இந்த மத ரீதியான துன்புறுத்தல் நிறுத்தப்பட வேண்டும்.”

கனடா முழுவதிலும் உள்ள நூறாயிரக்கணக்கான யூத கெனேடியர்களைப் பிரதிநிதித்துவப்படுத்தும் CIJA, ஈரானின் சமீபத்திய நிலைகள் குறித்து மிகுந்த கவலையை வெளிப்படுத்தும் ஓர் அறிக்கையை வெளியிட்டது. “யூதர்கள் எனும் முறையில், ஒரு முழு சமூகத்திற்கும் எதிராக பொய்கள் மற்றும் கட்டுக்கதைகளை இடைவிடாமல் மீண்டும் மீண்டும் பரப்புவதன் கொடிய விளைவுகளை நாங்கள் அறிவோம். கட்டுப்படுத்தப்படாவிடில், ஈரானிய ஆட்சியின் பொய்பரப்புரைகள் பஹாய்கள் தங்கள் சொந்த நிலத்திலேயே அந்நியர்கள் மற்றும் அவர்கள் பாரபட்சம், வன்முறை ஆகியவற்றுக்கு உட்படுத்தப்பட வேண்டியவர்கள் எனும் எண்ணத்தைத் தூண்டிவிடும்.

“இது நிறுத்தப்பட வேண்டும். பஹாய்களுக்கு எதிராக, குற்றம் ஏதும் செய்யாத நிலையில், அவர்களைத் தண்டனைக்கு உட்படுத்தும் எண்ணற்ற மனித உரிமை மீறல்களுக்கு ஈரான் பொறுப்பேற்க வேண்டும் என்பதில் கெனடாவும் தனது பங்கை ஆற்றிட வேண்டும்.”

ஐக்கிய அமெரிக்காவில், இன்று நடைபெற்ற விசாரணையில் ஈரானில் பஹாய்களின் நிலை குறித்து சாட்சியமளிக்க பஹாய் சமூகத்தின் பிரதிநிதியைக் காங்கிரஸின் மனித உரிமை ஆணையம் அழைத்துள்ளது.

சர்வதேச மத சுதந்திரத்திற்கான அமெரிக்க ஆணையத்தின் (USCIRF) தலைவரான நடீன் மென்ஸா கூறுவதாவது, “ஈரான் அரசு தான் நிதியுதவி வழங்கும் ஊடகங்களில் பஹாய்களுக்கு எதிரான தூண்டுதலை விரிவுபடுத்தியுள்ளது என்ற செய்தியால் நாங்கள் திடுக்கிடுகிறோம். ஈரான் நாடு, அந்நாட்டில் பஹாய்கள் மற்றும் பிற சிறுபான்மை மதத்தினருக்கு மதம் அல்லது நம்பிக்கை சுதந்திரத்திற்கு உத்தரவாதம் அளிக்க வேண்டும். ”

ஆஸ்திரேலியாவின் சிட்னியில் உள்ள கிறிஸ்தவ-முஸ்லீம் உறவுகளுக்கான கத்தோலிக்க கொலம்பன் மையத்தின் இயக்குனர் ரெவ். டாக்டர் பேட்ரிக் மெக்னெர்னி கூறுவதாவது, “சமீபமாக, ஈரானில் பஹாய்களுக்கும் அவர்களது மதத்திற்கும் எதிரான வெறுப்புப் பேச்சு மற்றும் வெறுப்பைத் தூண்டிவிடுவது குறித்து நான் எனது கண்டனத்தை தெரிவிக்கின்றேன். சரித்திரம் மீண்டும் திரும்பவும் நிகழ வேண்டாம். பஹாய்களுக்கு எதிரான வெறுப்பு பிரச்சாரத்தை நிறுத்துங்கள். வெறுப்புக்கு பதிலாக, அங்கு மரியாதை, கருணை, அன்பு ஆகியன நிலவட்டும். ”

1979 இஸ்லாமியப் புரட்சிக்குப் பின்னர் பஹாய்களுக்கு எதிரான ஈரானிய அரசாங்கத்தின் தாக்குதலில் பொய் தகவல்களைப் பரப்புவது ஒரு முக்கிய ஆயுதமாகும். பஹாய்களைத் தீயவர்களாக்குவதும், அச்சமூகத்தின் மீது பொது வெறுப்பைத் தூண்ட முயல்வதும் இதன் குறிக்கோளாகும். அதன் மூலம் அவர்களுக்கு எதிரான குற்றங்கள் நியாயப்படுத்தப்படுகின்றன. இது வரலாறு முழுவதும் அடக்குமுறையைக் கையாளும் அரசாங்கங்களால் பயன்படுத்தப்படும் மிகவும் பொதுவான தந்திரமாகும்.

இந்த மோசமான மற்றும் தொடர்ச்சியான பிரச்சார சூழல் நிலவியபோதிலும், ஈரானில் உள்ள பஹாய்களுக்கு இந்த அறிக்கைகளுக்கு எதிராக சட்டப்பூர்வமாக மேல்முறையீடு செய்ய உரிமை இல்லை அல்லது நாட்டின் எந்தவொரு ஊடகத்திலும் தங்கள் சொந்த குடிமக்களுக்கு பதிலளிப்பதற்கும் தங்கள் சொந்த வழக்கை முன்வைப்பதற்கும் அவர்களுக்கு அனுமதி இல்லை. அவை அனைத்தையும் அரசாங்கம் கட்டுப்படுத்தியுள்ளது.

ஈரான் பஹாய்களின் வலைத்தளத்தில் ஒரு புதிய நுண்தளமான ராஸ்டி (உண்மை) என்ற பெயரில் சுதந்திரமான மூலாதாரங்களை வழங்குவது உட்பட துல்லியமான தகவல்களை வழங்குவதற்காக அமைக்கப்பட்டுள்ளது. இது ஈரான் பஹாய்களைக் குறிவைத்து பிரச்சார இயந்திரங்களால் உருவாக்கப்பட்ட ஆதாரமற்ற குற்றச்சாட்டுகள் மற்றும் தவறான தகவல்களுக்கு பதிலளிக்கும் முயற்சியாகும்.

BIC’யினால் நேற்று வெளியிடப்பட்ட ஒரு வீடியோ, ஈரானில் பஹாய்கள் துன்புறுத்தப்படுவது தொடர்பாக உலகளாவிய கூக்குரலில் சேருமாறு மக்களுக்கு அழைப்புவிடுத்து, #StopHatePropaganda எனும் ஹேஷ்டேக்கை ட்விட்டரில் அறிமுகப்படுத்தியது.

மூலாதாரம்: https://news.bahai.org/story/1519/



12 ஜூலை 2021


காலேஜ் பார்க், மேரிலாந்து, ஐக்கிய அமெரிக்கா, (BWNS) – ஒவ்வொரு கல்வியாண்டிலும், மேரிலாந்து பல்கலைக்கழகத்தில் உலக அமைதிக்கான பஹாய் இருக்கை (chair) ஒரு தனித்துவமான பாடத்திட்டத்தை வழங்குகிறது, இது, சமூகவியலான சவால்களுக்கான மூல காரணங்களை, அனைத்து வகையான தப்பெண்ணங்களையும் நீக்குதல், பெண்கள் மற்றும் ஆண்களின் சமத்துவம், மற்றும் கலந்தாலோசனை போன்ற ஆன்மீகக் கொள்கைகளின் அடிப்படையில் அடையாளம் காண மாணவர்களுக்கு உதவுகிறது. “கல்லூரி முழுவதும் நான் 35 பாடங்கள் எடுத்தேன், ஆனால், இது ஒன்று மட்டும்தான் நான் உலகை எப்படிப் கண்ணுறுகிறேன் என்பதற்கான அடிப்படைகளை மாற்றியது” என்று வகுப்பின் முன்னாள் மாணவர் எமிலி கோரே கூறுகிறார்.

“நான் பிறந்து வளர்ந்த மேரிலாந்தின் ஹோவர்ட் மாவட்டத்திற்கு வெளியே உலகம் எவ்வளவு வித்தியாசமாக இருக்கிறது என்பதை இங்கேதான் கற்றுக்கொண்டேன். சமத்துவமின்மையானது நம் அமைப்புகள், எண்ணங்கள் மற்றும் சூழல்களில் எவ்வளவு நிசப்தமாகப் பதிந்துள்ளது என்பதைக் நான் கற்றுக்கொண்டேன். பச்சாத்தாபப்படும் ஆற்றல் என்னிடமும் மற்றவர்களிடமும் ஏற்பட்டுள்ளதை நான் கண்டேன்.

“என் சக மனிதர்களுக்கு உதவுவதில் எனது சிறிய பங்கைச் செய்வதற்கான கருவிகள் எனக்கு வழங்கப்பட்டுள்ளன,” என்று திருமதி. கோரே கூறுவதுடன் சந்தை துறையில் தனது தொழில் “மக்களையும் இவ்வுலகையும் இலாபங்களுக்கு மேற்பட்டவை என ஊக்குவிக்கும் குரல்களை” பெருக்குவதற்கு எவ்வாறு உதவுகிறது என்பதைப் பார்க்கிறார்,

(பஹாய்) இருக்கையின் தலைவர் ஹோடா மஹ்மூதி, பாடத்திட்டத்திற்கான உந்துதல் பற்றி பேசுகிறார்: “பஹாய் திருவாக்குகள் ஒரு நியாயமான மற்றும் அமைதியான சமுதாயத்தை உருவாக்குவதற்கான மிகப்பெரிய தடைகளில் தப்பெண்ணமும் அடங்கும் என்பதை தெளிவுபடுத்துகின்றன. எல்லா வகையான தப்பெண்ணங்களையும் சமாளிக்க உணர்வுபூர்வமாக உழைக்க இளைஞர்களின் ஒவ்வொரு தலைமுறையிலும் உருவாக்கப்படாவிட்டால், சமூக ஒழுங்கின் எந்தப் பகுதியிலும் குறிப்பிடத்தக்க தன்மைமாற்றத்தை ஏற்படுத்துவது கடினம். ”

“பஹாய் சமூகம் இதுவரை இதைத்தான் செய்திட முயன்று வந்துள்ளது; இந்த வகுப்பிற்கும் அதே நோக்கம் உள்ளது.”

மற்றொரு முன்னாள் மாணவர், அஷ்லி டெய்லர், பங்கேற்பாளர்கள் தங்களது சொந்த சமூக மெய்நிலைக்கு தார்மீகக் கொள்கைகளைப் பயன்படுத்துவதைப் புரிந்துகொள்ள இந்த பாடநெறி எவ்வாறு உதவுகிறது என்பதை அவதானிக்கின்றார். “வகுப்பு, சமாதானம் போன்ற ஒரு பெரிய கருத்தியலான யோசனையைக் கண்ணுற்று, நம்மிடையிலும், நம் சமூகத்திலும், நமது சமுதாயத்திலும் எவ்வாறு சமாதானத்தை உருவாக்க முடியும் என்பதைப் பற்றி சிந்திக்க ஆணித்தரமான வழிகளை உருவாக்குகிறது.”

அவர் தொடர்கிறார்: “நாங்கள் இப்போது கடந்து வரும் காலங்களில், வகுப்பில் நாங்கள் நடத்திய மிகவும் கடினமான மற்றும் மிகவும் அணுக்கமான விவாதங்களை அவர்கள் தங்களின் நண்பர்களுடன் குடும்பங்களுடனும் எவ்வாறு இனவெறி பற்றிய ஆக்கபூர்வமான உரையாடல்களைத் தொடங்குகிறார்கள் என்பதை நான் மாணவர்களிடமிருந்து செவிமடுத்துக்கொண்டிருக்கிறேன்.”

“தப்பெண்ணம் பற்றிய பிரச்சினை” என்ற தலைப்பிடப்பட்ட பாடம், அமைதி குறித்த சொற்பொழிவின் தலைவரின் ஆய்வுக்கு மையமான ஐந்து கருப்பொருள்கள் பற்றிய ஆழமான கலந்துரையாடலைத் தூண்டுகிறது: கட்டமைப்பான இனவாதம் மற்றும் தப்பெண்ணத்தின் மூல காரணங்கள், மனித இயல்பு, பெண்களுக்கு சக்தியூட்டல் மற்றும் அமைதி, உலகளாவிய ஆளுகை மற்றும் தலைமைத்துவம் , மற்றும் சுற்றுச்சூழலை உலகமயமாக்கலில் உண்டாகும் சவால்களை சமாளித்தல்.

பயிற்சிப்பாடம் இந்த கருப்பொருள்கள் பற்றிய அறிவார்ந்த ஆராய்ச்சியையும் உள்ளடக்கியதுடன் சமூகப் பிரச்சினைகளின் தன்மையை ஆழமாகப் புரிந்துகொள்ள முயலும்போது வாராந்திரமான பிரதிபலிப்புகளை எழுதுமாறு மாணவர்களைக் கோருகிறது.

ஒவ்வொரு செமஸ்டர் முடிவிலும் மாணவர்கள் மனிதகுலத்தின் ஒற்றுமை குறித்த உயர்த்தப்பட்ட விழிப்புணர்வைப் பெறுவார்கள் என டாக்டர் மஹ்மூதி விளக்குகிறார். “மக்கள் பெரும்பாலும் ஒரு பிரச்சினையில் மட்டும் கவனம் செலுத்துகிறார்கள், வெவ்வேறு சமூகப் பிரச்சினைகளுக்கும் அவை எவ்வாறு அமைதியுடன் தொடர்புபடுகின்றன என்பதற்கும் இடையிலான உறவைக் காண்பதில்லை.

“இந்த தொடர்புகளை ஏற்படுத்துவதன் மூலமும், தார்மீகக் கொள்கைகளின் வெளிச்சத்தில் சமூகப் பிரச்சினைகளின் காரணங்களைப் பற்றி சிந்திப்பதன் மூலமும், மாணவர்கள் சமூகத்தின் ஒரு பிரிவின் நல்வாழ்வுக்காக மட்டுமல்லாமல் அனைவருக்குமான அதிக அக்கறையுடன் பாடத்திட்டத்திலிருந்து பயன் பெறுகிறார்கள்.”

மூலாதாரம்: https://news.bahai.org/story/1518/



6 ஜூலை 2021


பஹாய் உலக மையம் — பணிகள் மேம்பாடு காண்கையில், அப்துல்-பஹா நினைவாலய வடிவமைப்பின் தனித்துவமான கட்டிடக்கலை அம்சங்கள் பல வெளிப்படையாகி வருகின்றன.

மத்திய கட்டிடத்தின் எட்டு தூண்கள் இப்பொழுது பூர்த்தியாகிவிட்டன. மத்திய தளத்தின் மேற்குப் பகுதியில் உள்ள மடிவு சுவர்கள் பூர்த்தியாகி, தெண் தளத்தின் வாசல் சுவர் ஒன்றுடன் இணைக்கப்பட்டு வருகின்றன.

அதே நேரம், மத்திய தளத்தின் வழி ஓர் நுண்மையான தட்டி கட்டமைப்பை நிர்மாணிக்கும் பணிக்கான ஆயத்தங்கள் செய்யப்பட்டு வருகின்றன.

இந்த அம்சங்கள் குறித்த மேம்பாடு கீழ்காணப்படும் படத் தொகுப்பில் சித்தரிக்கப்பட்டுள்ளன.

இந்த அகல்பரப்பு படம் எட்டு தூண்களில் ஆறைக் காட்டுகிறது. அவை அனைத்தும் முடிவடைவதற்கு முன்னர் பிரதான கட்டிடத்தின் முக்கிய கட்டமைப்பு அம்சங்களாகும்.

பிரதான கட்டிடத்தின் எட்டு தூண்கள் இப்போது நிறைவடைந்துள்ளன, மேலும் தூண்கள் மற்றும் முடிக்கப்பட்ட மடிப்பு சுவர்களுக்கு இடையிலான இடைவெளியில் சாரக்கட்டு அமைக்கப்பட்டுள்ளது.

மடிப்பு சுவர்களின் அரை வட்டம் இப்போது மத்திய தளத்தின் ஒரு பக்கத்தை உள்ளடக்கியுள்ளது. மடிப்பு சுவர்களின் இரண்டாவது தொகுப்பு இப்போது கட்டப்பட்டு வருகிறது, இது தளத்தின் எதிர் பக்கத்தில் முதலாவதை பிரதிபலிக்கிறது.

மடிப்பு சுவர்களின் பூர்த்தி செய்யப்பட்ட தொகுப்பு தெற்கு தளத்தின் வாசல் சுவர்களில் ஒன்றில் இணைக்கப்பட்டுள்ளது. இந்தப் படத்தின் இடதுபுறத்தில் தெரியும், நினைவாலயத்தைச் சுற்றியுள்ள பாதைக்காக கட்டப்பட்ட அடித்தளங்கள். பாதை மற்றும் சுவர்களுக்கு இடையிலான இடைவெளி இறுதியில் ஒரு சாய்வான தோட்ட தடுப்புச் சுவரினால் நிரப்பப்படும்.

வடக்கு தள பகுதியில் உள்ள தோட்டத் தோட்டிகளின் முன்னேற்றம் இங்கே காணப்படுகிறது. பூர்த்தி செய்யப்பட்ட தொட்டிகளின் இரண்டு செட்டுகளுக்கு இடையிலான இடைவெளி வடக்கு பிளாசா வழியாக சுற்றி வளைக்கும் பாதை எங்கு செல்லும் என்பதைக் காட்டுகிறது.

வடமேற்கில் இருந்து ரித்வான் தோட்டத்தை நோக்கிய ஒரு வான்வழி காட்சி.

மூலாதாரம்: https://news.bahai.org/story/1517/


அன்பும் ஒற்றுமையும் – விதை விதைக்கும் நாள்கள்

ஏப்ரல் 12ம் நாள் பிற்பகலின் போது, மேக்நட் தம்பதியினர் புரூக்லின்னில் உள்ள தங்கள் இல்லத்தை அப்துல்-பஹாவிற்காக திறந்துவிட்டும், விருந்தினர்கள் பலர் அவரைக் காணவும் வாய்ப்பளித்தனர். மேக்நட் தம்பதியினரின் இல்லத்தில், பல பஹாய்கள் உணர்ந்திராத ஒன்றான, தெய்வீக வெளிப்பாட்டின் நோக்கம் ஐக்கியமே என்பதை அப்துல்-பஹா வலியுறுத்தினார், அன்பே அவ்வொற்றுமைக்கான வழி எனவும் கூறினார். இந்த அடிப்படையான ஆன்மீகப் போதனையை உலகின் பல பாகங்களில் வெடித்திருந்த போர்களோடு அவர் எதிர்ப்படுத்தினார்.

ஹோவர்ட் மேக்நட் இல்லம், ஜூன் 17, 1912

“தெய்வீகக் கொடைகளின் கீழிறக்கத்தின் வழி மானிடத்தின் அரும்பெரும் நற்பண்புகளை அடைதலே மனிதன் படைக்கபட்டதன் நோக்கமாகும். ஆன்மீக உலகிலும் அதுபோன்றதே நிலை. அவ்வுலகம் பூரண ஈர்ப்பும் இணக்கமும் உடையதாகும். அது ஒரே தெய்வீக ஆவியின் அரசான, கடவுளின் திருவரசாகும். ஆகவே, இங்கு வெளிப்படும் இணக்கமும் அன்பும், இங்கு காணப்படும் தெய்வீகத் தாக்கங்களும் இவ்வுலகைச் சார்ந்தவையல்ல, மாறாக அவை திருவரசைச் சார்ந்தவையாகும். …ஒற்றுமைக்கு மாறாக முறன்பாடுகள் தோன்றுமாயின், அன்பு, ஆன்மீகத் தோழமை ஆகியவற்றின் இடத்தில் வெறுப்பும் பகைமையும் வீற்றிருக்குமாயின், அங்கு இயேசுவுக்குப் பதிலாக இயேசுவின் எதிரியே ஆட்சி செலுத்துவான். …நாம் அவரது திருவாக்கின் சக்தியின் மூலமாக, சிலர் அமெரிக்காவிலிருந்தும், நான் பாரசீகத்திலிருந்தும், அனைவரும் அன்பினாலும் ஒற்றுமையுணர்வினாலும் இங்கு ஒன்றுகூட்டப்பட்டுள்ளோம். கடந்த நூற்றாண்டுகளில் இது சாத்தியப்பட்டதா? ஐம்பது ஆண்டுகளான தியாகம், போதனை ஆகியவற்றிற்குப் பிறகு இப்போது சாத்தியப்பட்டுள்ளதெனில், வரப்போகும் அற்புதமான நூற்றாண்டுகளில் நாம் எதிர்ப்பார்க்கக்கூடியவை எப்படியிருக்கும்?”

அதற்குப் பிறகு அன்று, 39 வெஸ்ட் 67வது தெருவிலுள்ள மிஸ் ஃபிலிப்சின் ஸ்டூடியோவில் உரையாற்றினார். அப்பெரிய அறை மேற்புறத்திலிருந்து ஒளியூட்டப்பட்டிருந்தும் அப்துல்-பஹாவின் முகத்தில் நிழல்கள் விழச்செய்து அதை கரடுமுரடாக்கி மேலும் அதிக ஆற்றலுடன் தென்படச் செய்தது. அங்கு கூடியிருந்தவர்களிடமும் அவர் மீண்டும் அன்பு குறித்தும் பிறருக்கான சேவையே அவ்வன்பின் வெளிப்பாடெனவும் வலியுறுத்தினார். அவர் கூடியிருந்தோரில் அவர்கள் வாழும் காலத்தின் முக்கியத்துவம் குறித்த ஒரு விழிப்புணர்வை ஏற்படுத்திட முனைந்தார்: “ஆகவே, தெய்வீக போதனைகளின் முதல் கோட்பாடாகிய அன்பின் அடிப்படையில் உங்கள் வாழ்க்கைகளை ஒழுங்குபடுத்துங்கள். மானிடத்திற்கான சேவை கடவுளுக்கான சேவையாகும். …நீங்கள் வாழும் இந்நாளின் மதிப்பை உணர்கிறீர்களா? …இவை விதை விதைப்பதற்கான நாள்கள். …இது பஹாவுல்லாவின் இளவேனிற்காலம். ஆன்மீக வளர்ச்சியின் பசுமையும் இலைதலைகளும் மனித உள்ளங்களெனும் தோட்டங்களில் பெரும் வளத்துடன் மலர்வுறுகின்றன. கடந்து செல்லும் இந்நாள்கள், மறைந்திடும் இரவுகள் ஆகியவற்றின் மதிப்பை உணர்வீர்களாக. நீங்கள் ஒருவருக்கொருவர் பூரண அன்பு குறித்த ஒரு ஸ்தானத்தை அடைந்திட முயல்வீர்களாக.”


குழந்தைகளின் கல்வி பற்றிய ஒரு கதை

பஹாய் சமயத்தின் ஒரு மாபெரும் கோட்பாடும், பஹாய் சமூகத்தினரின் ஆர்வமிகு நடவடிக்கைகளுள் ஒன்றாகவும் இருப்பது குழந்தைகளின் ஆன்மீகக் கல்வியாகும். தமது அமெரிக்க விஜயத்தின்போது  அப்துல்-பஹாவின் பெரும்பாலான உரைகளின் கருப்பொருளாக இவ்விஷயமே இருந்தது. அவர் ஐக்கிய அமெரிக்காவை சென்றடைந்தவுடன் வழங்கிய முதல் உரையிலும் இக்கருப்பொருள் உள்ளடங்கியிருந்தது.

 அப்துல்-பஹா, அமெரிக்காவின் கிழக்குக்கரையிலும், மேற்குப்பகுதியின் மத்தியிலும் குழந்தைகளின் ஒன்றுகூடல்கள் பலவற்றில் உரையாற்றினார். ஓக்லன்ட், கலிஃபோர்னியாவில் அவ்வாறான ஓர் உரையை செவிமடுத்த ஒரு பெண்மணி, பிறகு பின்வாருமாறு எழுதினார்:

 “ அப்துல்-பஹா தமது உரையை முடித்தவுடன் சந்தோஷத்தாலும் அவர்மீது கொண்ட வாஞ்சையினாலும் என் உள்ளம் நிறைந்திருந்தது. வெகு அன்பாக அவரது மென்மைமிகு, அழகான குரலில், தமது வழிகாட்டல்களை உரைத்திட்ட மாஸ்டர் அவர்களின் சொற்களால் நிறைந்திருந்த நினைவுகளோடு நாங்கள் இல்லம் திரும்பினோம்.” (Ramona Allen Brown, “Memories of ‘Abdu’l-Bahá” p. 61)

ஏப்ரல் 24, 1912ல்  அப்துல்-பஹா ஒரு குழுந்தைகள் ஒன்றுகூடலில் கலந்துகொண்டு பெற்றோர்களிடம் பின்வருமாறு கூறினார்:

 “இன்று ஒளிபெற்ற ஆன்மீகக் குழந்தைகள் இங்கு ஒன்றுகூடியுள்ளனர். அவர்கள் திருவரசின் குழந்தைகள். தெய்வீக அரசு இத்தகைய ஆன்மாக்களுக்கே உரியதாகும், ஏனெனில் அவர்கள் கடவுளுக்கு வெகு அணுக்கமாக இருக்கின்றனர். அவர்கள் தூய உள்ளத்தைக் கொண்டிருக்கின்றனர். அவர்கள் ஆன்மீக வதனத்தைப் பெற்றுள்ளனர். தெய்வீக போதனைகளின் விளைவுகள் அவர்களின் முழுநிறைவான தூய்மைமிகு உள்ளங்களில் வெளிப்படுகின்றன. அதனால்தான் இயேசு உலகோரை நோக்கி பின்வருமாறு கூறினார்: ‘நீங்கள் மாற்றமடைந்தும், சிறுகுழந்தைகள்போல் ஆகாத வரையிலும், நீங்கள் தெய்வீக இராஜ்யத்தினுள் நுழைய முடியாது’ – அதாவது, கடவுளை அறிந்துகொள்ள மனிதர்கள் தூய்மையான உள்ளத்தைப் பெறவேண்டும்…’ நான் இக்குழந்தைகளின் சார்ப்பாக பிரார்த்தித்து, கடவுளின் நிழலிலும் பாதுகாப்பிலும் பயிற்றுவிக்கப்படவும், அதன்வாயிலாக அவர்கள் ஒவ்வொருவரும் மானிட உலகில் ஏற்றிவைக்கப்பட்ட மெழுகுவர்த்திகளாகவும், அப்ஹா ரோஜா தோட்டத்தில் வளரும் மென்மைமிகு பயிர்களாகவும் ஆகிட அவர்களுக்காக அப்ஹா இராஜ்யத்தின் உறுதிப்பாடுகளையும் உதவியையும் இறைஞ்சுகின்றேன்; இக்குழந்தைகள் மானிட உலகிற்கு உயிரளித்திடவும்; அவர்கள் அகப்பார்வைகள் பெறவும்; உலக மக்களுக்குச் செவிகள் வழங்கிடவும்; அவர்கள் நித்திய வாழ்விற்கான விதைகளை விதைத்திடவும் கடவுளின் திருவாயிலில் வரவேற்கப்படவும்;   நன்றிப் பெருக்குடனும் நம்பிக்கையுடனும் அவர்களின் தாய்களும் தந்தைகளும், உறவினர்களும் கடவுளுக்கு நன்றி செலுத்திடுமளவிற்கு அத்தகைய நெறிமுறைகள், முழுநிறைவுகள், பண்புகள் ஆகியவற்றால் அடையாளப்படுத்தப்படவும் வேண்டும். இதுவே என் ஆவலும் பிரார்த்தனையுமாகும்.”

(The Promulgation of Universal Peace, p. 53; 2007 edition, pp. 72-73)

 அப்துல்-பஹா, குழந்தைகளை ஆன்மீகம் நெறிமுறை ஆகியவற்றில் பயிற்றுவிப்பதன் முக்கியத்துவம் குறித்து இதே போன்ற வலியுறுத்தலை தமது எழுத்தோவியங்களிலும் வழங்குகிறார்:

“குழந்தைகள் புத்துயிரும் பசுமையும் மிக்க ஒரு கிளையைப்போன்றவர்கள்; நாம் அவர்களைப் பயிற்றுவிக்கும் விதத்தில்தான் அவர்கள் வளரவும் செய்வார்கள். அவர்களுக்கு உயர்ந்த இலட்சியங்களையும் குறிக்கோள்களையும் வழங்கிட மிகுந்த அக்கறை எடுத்துக்கொள்ளுங்கள்,  அதனால் வயது வந்தவுடன், அவர்கள் பிரகாசமிக்க மெழுகுவர்த்திகளைப் போன்று தங்கள் ஒளிக்கதிர்களை உலகின்மீது வீசிடக்கூடும்; கவனமின்மை அக்கறையின்மை ஆகிய மிருக இச்சைகள் உணர்வெழுச்சிகள் ஆகியவற்றால் மாசுபடாது இருக்கவும்கூடும்.”

(Selections from the Writings of ‘Abdu’l-Bahá, p. 136)


“நீங்கள் என்னை வரவேற்பதற்கு மாறாக நான் உங்களுக்கு ‘நல்வரவு’ கூறப் போகின்றேன்”

 (பகுதி 2)

ஒழுக்கநெறிகள் மேம்படுத்தப்பட்டாலொழிய, மானிடம் உண்மையான அபிவிருத்தியை அடைந்திட இயலாததாக இருக்கும். உண்மையான அபிவிருத்தியென்பது மானிட உலகு தெய்வீக நெறிமுறைகளுக்கு மையமாகவும், இரக்கமிக்கவரின் ஒளிர்வுகளுக்கான தலமாகவும், கடவுளின் கொடைகளைப் பிரதிபலித்திடும் ஒரு கண்ணாடியாகவும் ஆவதைப் பொருத்திருக்கின்றது. அதன் மூலமாக மானிட உலகு கடவுளின் பிரதிபிம்பமாகவும் சாயலாகவும் ஆகிடக்கூடும். மானிட உலகில் இவ்வொழுக்க நெறிகள் அவற்றை வெளிப்படுத்திக்கொள்ளும் வரை, உண்மையான மேம்பாடும் அபிவிருத்தியும் அடையப்பட முடியாது.

சிக்காகோ கோவில் கட்டுமாணம் குறித்த கூட்டம் ஒன்றில் அப்துல்-பஹா உரையாடுகின்றார்.

புனிதர் பஹாவுல்லா, மனிதகுலம் முழுமையையும் நோக்கி: “நீங்கள் அனைவரும் ஒரே மரத்தின் இலைகளும் ஒரே கிளையின் கனிகளும் ஆவீர்,” எனப் பகன்றுள்ளார். இது குறிப்பிடுவது மானிட உலகு ஒரே மரத்தை பிரதிநிதிக்கின்றது, மற்றும் மனிதகுலம் முழுவதும் அதன் இலைகளையும், மலர்களையும், கனிகளையும் பிரதிநிதிக்கின்றது என்பதாகும். ஆகவே, இவ்வுலகவாசிகள் அனைவரும் இம்மரத்தோடு கொண்டிருந்த தங்களின் பற்றின் வாயிலாக வளர்ந்துள்ளனர், தெய்வீகக் கருணையெனும் மழைப்பொழிவின் மூலம் வளர்க்கப்பட்டும், பேணப்பட்டுமுள்ளனர். இப்போதனையே இக்காலக் கட்டத்தின் உணர்வு என்பது வெள்ளிடைமலை. அது வாழ்வளிக்கின்றது, ஏனெனில் அன்பின் மூலம் அது மக்களை உயிர்ப்பிக்கின்றது, மற்றும் அன்னியப்படுத்துதலை அது முற்றாக அகற்றுகின்றது. அது அனைவரையும் நட்பிலும் ஐக்கியத்திலும் ஒன்றுபடுத்துகின்றது.

பஹவுல்லாவின் போதனைகளுள் ஒன்று, மனிதன் எல்லா நிலைகளிலும், சூழல்களிலும் மன்னிக்குந் தன்மையுடனும், தன் எதிரியை நேசிப்பவனாகவும், தீது நினைப்பவரை நலன் விரும்பியெனவும் கருத வேண்டும். அதாவது அவர் ஒருவரைத் தன் எதிரியென தீர்மானித்தும் அதன்பின் அவரை பொறுத்துக்கொள்ளவும் வேண்டும் என்பது இதன் அர்த்தமல்ல, அல்லது வேறு வழியின்றி அவரைச் சகித்துக்கொள்வது, அல்லது அவரைத் தன் பகையாளி என கருதி அவருடன் சகிப்புத்தன்மையோடு பழகுவதும் அல்ல. இது உள்ளொன்று வைத்துப் புறமொன்று பேசுவதாகுமென வலியுறுத்தப்பட்டுள்ளது. இந்த அன்பு உண்மையானதல்ல. மாறாக, நீங்கள் உங்கள் எதிரிகளை நண்பர்களாகவும், தீமை விரும்பிகளை நன்மை விரும்பிகளாகவும் பார்த்து அவர்களை அவ்வாறாகவே நடத்தவும் வேண்டும்.

அதாவது, உங்கள் அன்பும் கருணையுணர்வும் உண்மையானவையாக இருக்க வேண்டும் என்பதாகும். உங்களின் நலம் விரும்புதல் மெய்யானதாகவும், வெறும் சகிப்பிற்காக மட்டுமே இருக்கக்கூடாது, ஏனெனில் சகிப்புத்தன்மையானது உள்ளத்திலிருந்து உதிக்காவிடில், அது வெளிவேஷமாகிவிடும். மெய்ம்மையின் மக்கள் அதை ஏற்றுக்கொள்ளமாட்டார்கள்.

பஹாவுல்லாவின் போதனைகளுள் தியாகமும் ஒன்றாகும். மனிதன் தியாகத்தின் நிலையை அடையவேண்டும் மற்றும் தியாகத்தின் ஸ்தானம் என்பது முற்றிலும் விடுபட்ட ஒரு நிலையாகும்; அதாவது அவனுடைய சொத்துக்கள், வசதிகள், அவன் உயிர்கூட மானிடத்திற்காக தியாகம் செய்யப்பட வேண்டும். மனிதன் இந்த ஸ்தானத்தை அடையும் வரை, அவன் கடவுளின் பேரொளிகளையும், இரக்கமிக்கவரின் கொடைகளையும், இப்பிரகாசமிகு நூற்றாண்டில், வெளிப்படையாகவும், பிறங்கொளிமிக்கதாகவும் ஆகியுள்ள புனித ஆவியின் மூச்சுக்காற்றையும் இழந்தவனாவான்.

பஹாவுல்லாவின் போதனைகளுள், கடவுள் மனிதனைப் படைத்துள்ளதன் நோக்கம் மனிதன் தனது உள்ளமை அல்லது வாழ்தலின் மூலம் ஏதாவது பலனை, ஒரு நித்திய கனியை, ஓர் என்றும் நிலையான விளைவை அளித்திட வேண்டும் எனும் பொருண்மைக்கு ஒப்பான ஒரு போதனை உள்ளது. இவ்வுலக வாழ்வு குறுகியதாகையால், இவ்வுலகின் ஆசிகள் தற்காலிகமானவை, இந்த இயலுலகின் பசுமைகள் தற்காலிகமானவை, இயலுலகின் மகிழ்ச்சிகள் தற்காலிகமானவை, மற்றும் மானிட உலகு குறுகிய காலம் கொண்ட இப்பொருளுலகின் எல்லைகளுக்கு உட்பட்டிருக்குமானால், மனிதன் தன் சக்திகளை தற்காலிக விளைவுகளுக்காக அர்ப்பணிப்பானானால், இது கனி கொடுப்பதாகாது, அது தற்காலிகமானது ஆகையால் அதனால் எவ்வித பயனுமில்லை. இல்லையில்லை, மாறாக, மனிதன், என்றும் நிலையான ஆன்மீகம் அவனுடையதாகிட அவன் நித்திய கனிகள் கொடுக்கும் ஒரு புனித விருட்சமாக இருந்திட வேண்டும்

மானிட உலகின் உண்மையான கனி என்றும் நிலையானது, அது கடவுள் மீதான அன்பே ஆகும், அது கடவுளைப் பற்றிய அறிவாகும், அது மானிடத்திற்கான சேவையாகும், அது மனிதகுலம் முழுமைக்குமான அன்பாகும், அது மானிட உலகின் – முழுநிறைவான மேம்பாடான – லௌகீக மற்றும் ஆன்மீக மேம்பாட்டிற்காக முயற்சிப்பதும் போராடுவதுமாகும். இதுவே என்றும் நிலையான கனியாகும். இதுவே தெய்வீகச் சுடரொளியாகும். இதுவே தெய்வீகக் கொடையாகும். இதுவே என்றும் நிலையான வாழ்வாகும்.

போதனைகள் நீண்டவை, ஆனால் அவற்றை நான் சுருங்கக் கூறியுள்ளேன், மற்றும் அடிப்படைகளாகிய, இச்சுருக்கவுரைகளின் மூலம், நீங்கள் போதனைகள் முழுமையையும் கற்றுக்கொள்ள வேண்டும்.

இறைவன் போற்றப்படுவாராக! நாம் இங்கு கூடியுள்ளோம், மற்றும் கடவுளின் அன்பே  நமது ஒன்றுகூடலுக்கான காரனமும் ஆகும். இறைவன் போற்றப்படுவாராக! இதயங்கள் ஒன்றுக்கொன்று அன்பு செலுத்துகின்றன, தெய்வீகக் கதிரொளி பிரகாசிக்கின்றது. இதயங்கள் நெகிழ்வுறவும், ஆன்மாக்கள் ஈர்ப்புறவும், யாவறும் பஹாவுல்லாவின் போதனைகளுக்கு ஏற்ப செயல்படவும் நான் நம்பிக்கைக் கொண்டுள்ளேன்.

(ஓக்லன்ட், கலிஃபோர்னியாவில் திருமதி ஹெலன் கூடாலின் இல்லத்தில், 3 அக்டோபர் 1912ல் அப்துல் பஹா ஆற்றிய உரை; Star of the West, vol. 4, no. 11, September 27, 1913)


நீங்கள் என்னை வரவேற்பதற்கு மாறாக நான் உங்களுக்கு ‘வரவேற்பு’ கூறப்போகின்றேன். உங்களுடன் இங்கிருப்பதில் எனக்குப் பெருமகிழ்ச்சி. அளவற்ற களிப்புடன் இருக்கின்றேன், மற்றும் இத்தகைய ஒரு சந்திப்பிற்குக் கருவியாக இருந்து வழிவகுத்த புனிதரான பஹாவுல்லா அவர்களின் திருவாக்கின் ஆற்றலுக்காக நான் அவருக்கு நன்றி செலுத்தினேன்.

சிக்காகோ கோவில் எழவிருக்கும் தலத்தில் நிர்மாணிக்கப்பட்ட கூடாரம்.

இவ்வுலகில் பல மக்கள் நாட்டுக்கு நாடு செல்கின்றனர். ஒரு வேளை அவர்கள் இங்கிருந்து கிழக்கு நாடுகளுக்குச் செல்லக்கூடும்; ஒரு வேளை கிழக்கிலிருந்து சிலர் இங்கு வரக்கூடும்; ஆனால் அப் பயணங்கள், சுற்றுலாவுக்காகவோ, வர்த்தக நோக்கத்துடனோ, அரசியல் காரணமாகவோ, அறிவியல் சாதனைக்காகவோ, நண்பர்களைச் சந்திப்பதற்காகவோ இருக்கலாம். அத்தகைய ஒன்றுகூடல்கள் தற்செயல் நிகழ்வுகளாகும்; அவை யாவும் இயல்புலகின் அவசரத்தேவைகள் சம்பந்தமானவையாகும்.

நான் கிழக்கிலிருந்து மேற்கிற்கு வந்துள்ளேன்—எத்தகைய வர்த்தக நோக்கமில்லாமலும் அல்லது சுற்றுலாவை நோக்கமாகக்கொண்டோ, அரசியல் காரணங்களுக்காவோ நான் இத்தூர பயணத்தை மேற்கொள்ளவில்லை. இப்பயணம் உங்களைச் சந்திப்பதற்காகவே மேற்கொள்ளப்பட்டது. மற்றவர்களின் சந்திப்புகள் பொதுவாகவே தற்செயலானவையாக இருக்கும் அதே வேளை, நமது சந்திப்பு உண்மையானது, இன்றியமையாதது—ஏனெனில் இதயங்கள் இணைக்கப்பட்டுள்ளன, ஆன்மாக்கள் ஈர்க்கப்பட்டுள்ளன, ஆன்மவுணர்வுகள் கிளர்வுற்றிருக்கின்றன, இத்தகைய கூட்டம் இயல்பில் உண்மையானது, மற்றும் அதிலிருந்து பிறக்கும் விளைவுகள் மகத்தானவையாகும். அவ்விளைவுகள் நிலையானவையாகும்.

கடந்து சென்ற காலங்களை நினைவுகூறுங்கள். அப்போது இது போன்ற கூட்டம் ஒன்று நடந்தது—அது மனசாட்சியின் ஈர்ப்பினால் தோன்றியது என்பதாகும். அதற்கு ஆன்மீக பந்தமே காரணமாகும். அதற்கு சுவர்க்கத்தின் சகோதர பந்தமே காரணமாகும். பின்னாளில் இணைநிலைப்பட்ட அதன் விளைவுகளைக் கருதுங்கள்! எத்தகைய ஒளிகள் அதிலிருந்து தோன்றியுள்ளன! அதிலிருந்த எத்தகைய புதிய ஆன்மவுணர்வுதான் சுவாசிக்கப்பட்டுள்ளது!

ஆதலால், நமது இக்கூட்டமும் அது போன்றே ஒரு ஆன்மீகக் கூட்டமாக, ஒரு தெய்வீக கூட்டமாக, ஒரு சுமுகமான பந்தமாக, தெய்வீகத்திற்கு உட்பட்டதாக, புனித ஆவியின் மூச்சுக் காற்றில் விளைந்ததாக ஆகிடவேண்டுமென நான் இறைவனை வேண்டுகின்றேன். அதன் தடயங்கள் நிலையானவையாக இருக்கட்டுமாக, அதன் விளைவுகள் நித்தியமானவையாக இருக்கட்டுமாக, அது அழியாத பந்தமாகவும் பிரிக்கப்படமுடியாத இணைவாகவும் இருக்கட்டுமாக. அது என்றுமே முடிவுறாத ஓர் அன்பாக இருக்கட்டுமாக. இதுவே என் எதிர்ப்பார்ப்பு, இறையரசின்பால் முகம் திருப்பியுள்ளோரே, கடவுளின் அன்பால் ஒளிர்வடைந்துள்ளோரே, இக்கூட்டம் என்றும்நிலையான விளைவுகளை உண்டாக்கிட நீங்கள் சற்றும் அயராமல் உழைத்திட வேண்டும். இதனால் நடைபெறக் கூடியது என்ன?

நீங்கள் பஹாவுல்லாவின் போதனைகளுக்கிணங்க செயல்படும்போது இது நடைபெறும். நீங்கள் தெய்வீக ஆவியினால் மறுவுயிர்ப்புறுவதை இது பொருத்திருக்கின்றது. ஒரு மனிதனின் உடலுக்கு அவனுடைய ஆன்மா எவ்வாறோ அவ்வாறே இவ்வுலக்கிற்கு பஹாவுல்லாவின் திருவெளிப்பாடு உள்ளது. உலகெனும் உடலோடு ஒப்பிடுகையில் தெய்வீகம் என்பது ஒரு விளக்கினுள் ஒளிவிடும் ஒளியைப் போன்றதாகும். உள்ளங்களெனும் நிலத்தோடு ஒப்பிடுகையில் அது உயிரளிக்கும் மழையைப் போன்றதாகும். மரங்களின் ஆன்மீக வளர்ச்சி எனும்போது அது வசந்தகால தென்றலைப் போன்றதாகும்; மற்றும் பிணியுற்ற அரசியல் அமைப்பிற்கு அது விரைவாகச் செயல்படும் நிவாரணியாகும், ஏனெனில் மானிட உலகின் ஒருமைத்தன்மைக்கு அதுவே மூலாதாரமாகும். அதுவே எல்லா மனிதர்களுக்கிடையிலான அன்பாகும். அது எல்லா சமயநம்பிக்கைகளையும் ஐக்கியப்படுத்திடும் பந்தமாகும். அது எல்லா இனங்களையும் இணைக்கும் ஐக்கியமாகும். அது எல்லா நாடுகளுக்குமிடையிலான தொடர்பாகும். அது தேசங்களுக்கிடையிலான சர்வலோக அமைதியாகும். அது எல்லா மக்களுக்குமிடையிலான சர்வலோக அமைதியாகும். அது எல்லா பிறந்தகங்களையும் ஒன்றுகூட்டவிருக்கும் சர்வலோக அமைதியாகும். சந்தேகமற அதுவே உலகின் ஆன்மாவாகும். அதுவே உலகின் ஒளியாகும். அதே போன்று அது அறிவாற்றல் பிரகடனத்திற்கு உத்வேகமளிப்பதாகும், மற்றும் அறிவியல், பகுத்தறிவிற்கிடையிலான இணக்கத்திற்குக் காரணமுமாகும்.

உலகின் தேசங்கள் யாவும் இன்று தப்பெண்ணங்கள், வெறுப்புணர்வு மற்றும் காழ்ப்புணர்வு போன்றவற்றிற்கு உயிரளிக்கும் குறிப்பிட்ட சில மூடநம்பிக்கைகளுக்கு உட்பட்டுள்ளனர். இம்மூட நம்பிக்கைகளே யுத்தங்களுக்கும் சண்டைகளுக்கும் காரணமாக இருக்கின்றன. சமயங்கள் சார்ந்த அறிவுக்குப் பொருந்தாத நடத்தைகள் பலவகைப்பட்டவையாகவும், போலியானவையுமாக இருக்கின்றன; ஆனால் பஹாவுல்லாவின் போதனைகள் மெய்ம்மையின் மறுவுருவமாகும், மற்றும் மெய்ம்மையே எல்லா தெய்வீக சமயங்களுக்கும் அடித்தலமும் ஆகும். ஆகவே இப்போதனைகளே மானிடத்தை ஐக்கியப்படுத்தவிருப்பதற்கான காரணிகளாகும். அவை மனித உள்ளங்களுக்கிடையே அன்பிற்குக் காரணமாகும், ஏனெனில் அவையே மெய்ம்மையாகும்.

அதே போன்று பஹாவுல்லாவின் போதனைகள் நன்னடத்தையை குறிக்கோளாகக் கொண்டிருக்கின்றன, மற்றும் நன்னடத்தையே சர்வ-மகிமைமிக்கவரின் அதிபெரும் ஒளிர்வுகளாகும்.

(ஓக்லேன்ட், கலிஃபோர்னியா ஹெலன் கூடோலின் இல்லத்தில் 3 அக்டோபர் 1912ல் அப்துல் பஹாவின் சொற்பொழிவிலிருந்து. Star of the West, vol. 4, no. 11, September 27, 1913)


கோவிட்-19’க்குக் காரணமான நவல் கொரோனா நச்சுயிரி–இது SARS-CoV-2 எனப் பின்னர் பெயரிடப்பட்டது–குறித்த முதல் மனித தொற்று கடந்த டிசம்பர் 2019’இல் சீன நாட்டின் வூஹான் நகரின் அதிகாரிகளால் அறிவிக்கப்பட்டது. கொரொனாவுக்கு முதன் முதலில் பலியானவர் அறுபது வயதைத் தாண்டிய வயோதிகர் ஒருவர். பின்னர் சீன சுற்றுலா பயணி ஒருவரினால் இந்த நோய் பிரான்ஸ் நாட்டிற்குப் பரவியது. வருடம் 2020 மார்ச் மாதத்தில் உலக சுகாதார அமைப்பு இந்த நோயை ஒரு பெருந்தொற்றாக பிரகடனம் செய்தது. இதற்குப் பிறகு இந்த நோய் உலகம் முழுவதும் பரவியது. பெரும்பாலான நாடுகள் இந்தத் தொற்று பரவாமல் தடுப்பதற்கு பல நடவடிக்கைகளை மேற்கொண்டன. இதில் முடக்க நடவடிக்கை, நடமாட்டக் கட்டுப்பாடு போன்றவை முக்கிய நடவடிக்கைகளாகும்.

நோய் மிகவும் மோசமாகப் பரவிய போது, இதற்கான தடுப்பு மருந்தைத் தயாரிக்க பல நாடுகள் முயன்றன. ஐக்கிய அமெரிக்காவில் இந்தத் தடுப்பூசியைத் தயாரிக்கும் பணி மும்முரமாகியது. முதல் மனிதர் மீதான சோதனை இரண்டு தடுப்பு மருந்துகளான அஸ்ட்ரா ஸெனேக்கா மற்றும் நோவாவேக்ஸ் கொண்டு மேற்கொள்ளப்பட்டது. இன்று பல தடுப்பூசிகள் தயாரிக்கப்பட்டுள்ளன மற்றும் தயாரிக்கப்பட்டும் வருகின்றன.

இந்த கோவிட்-19 நோய் பெருந்தொற்றாகிய போது, பல வதந்திகள் பரவ ஆரம்பித்தன. உதாரணமாக, இது மனிதர்களால் தயாரிக்கப்பட்ட ஒரு நச்சுயிரி எனவும் அது தவறுதலாக ஆராய்ச்சிக்கூடத்திலிருந்து வெளியாகி மனிதர்களிடையே பரவியது எனவும், இந்த தடுப்பூசிகளால் பல பக்கவிளைவுகள் உண்டாகின்றன எனவும் பெரும் மருந்தீட்டு நிறுவணங்களின் (pharmaceutical companies) பணம் சம்பாதிப்பதற்கான ஒரு சூழ்ச்சியாகவும் இது இருக்கலாம் எனவும் பலவிதமான வதந்திகள் உலா வந்தன.

எவ்வித வந்திகளானாலும் அவற்றின் வாய்மையைக் கண்டறியாமல் அவற்றின் மீது நம்பிக்கை வைப்போர் பலர் உள்ளனர். இதைத்தான் வள்ளுவர், “எப்பொருள் யார்யார்வாய்க் கேட்பினும் அப்பொருள் மெய்ப்பொருள் காண்பது அறிவு”, எனக் கூறியுள்ளார். தன்னிச்சையாக உண்மையை ஆராய்தல் பஹாய் கொள்கைகளில் ஒன்றாகும். இது சமயம் சம்பந்தமானது மட்டுமல்ல, இது எல்லா துறைகளுக்கும் பொருந்தும். சந்தேகங்கள் இருப்பின் நல்ல அனுபவசாலிகளான மருத்துவர்களின் ஆலோசனையை நாட வேண்டுமென பஹாய் சமயம் அறிவுறுத்துகின்றது.

white and black plastic bottle

சில பெற்றோர்கள் தங்கள் குழந்தைகளுக்குத் தடுப்பூசி போடுவதனால் அவர்களுக்கு மோசமான சில பக்கவிளைவுகள் ஏற்படுவதாகக் கூறி, தாங்கள் மட்டுமல்ல, தங்களுடன் சேர்ந்து பிற பெற்றோர்களையும் இதை நம்ப வைத்துள்ளனர். இவ்வித வதந்திகளின் பரவலில் முகநூல் (Facebook) முக்கிய பங்காற்றியுள்ளது. ஒரு செய்தி உண்மையா அல்லவா என்பது அறியப்படுவதற்குள் அது காட்டுத் தீ போன்று உலகம் முழுவதும் பரவிவிடுகின்றது.

சில இடங்களில், பல சாமியார்களும் இந்த தொற்றுநோய் வராமல் தங்களால் தடுக்க முடியும் எனக் கூறினர். அதில் ஒரு சாமியார் அதே கோவிட் தொற்றினால் தாமே இறந்தும் போனார். வேறு சிலரோ, வெண்ணீர் அருந்தினால் இந்த நோய் வராமல் தடுக்க முடியலும் என்றனர். சிலர் நாட்டு மருந்துகளைப் பரிந்துரைத்தனர். நாட்டு மருந்துகள் பரவாயில்லை ஆனால் அவை மட்டும் கோவிட்-19’ஐத் தடுத்திட முடியும் எனக்கூறுவது அபத்தமானது.

எவ்வாறாயினும், கோவிட்-19 ஒரு மெய்ம்மை, அதற்கு எதிராக நம்மைப் பாதுத்துக்கொள்ள வேண்டும். தடுப்பூசி போட்டுக்கொள்வது நம்மைப் பாதுகாப்பதற்காக மட்டுமல்ல, மாறாக, கோவிட் நோய் நம்மூலமாக பிறருக்குப் பரவாமல் இருப்பதற்கும் தடுப்பூசி ஒரு முக்கிய வழியாகும். நாம் நம்மைப் பற்றி மட்டும் நினைக்காமல் நமது சொந்து விருப்பு வெறுப்புகளைப் பற்றி மட்டும் பார்க்காமல் எதையும் முடிவு செய்வதற்கு முன்னால் நமது சமுதாயம் சார்ந்த கடமைகள் மற்றும் பொது நலன்கள் குறித்தும் சிந்திக்க வேண்டும்.

பெரும்பாலும் தடுப்பூசிகள், பல வருட காலங்களுக்கு சோதனை செய்யப்பட்ட பின்பே சந்தைக்கு வருகின்றன. ஆனால், கொரோனா-19’இன் கோரத் தாண்டவத்தினால் தடுப்பூசிகள் மிகவும் விரைவாக தயாரிக்கப்பட வேண்டிய ஒரு சூழ்நிலை உண்டாகியது. இருப்பினும், இத்தடுப்பூசி நன்கு பரிசோதிக்கப்பட்ட பிறகே பயன்பாட்டிற்குக் கொண்டுவரப்பட்டது.

இன்று இந்த கோவிட் பரவலினால் வேறு பல சமுதாய பிரச்சினைகளும் இன்று படிப்படியாகத் தோன்றியுள்ளன: உடல்நிலையில் நிரந்தர பாதிப்பு, முழு கதவடைப்பினால் பலர் தங்கள் வேலைகளை இழந்துள்ளனர், மற்றும் இழந்தும் வருகின்றனர், குடும்ப வன்முறைகளில் அதிகரிப்பு, மாணவர்கள் பள்ளி செல்ல முடிவதில்லை, அப்படியே இணையம் மூலம் கல்வியைத் தொடர்வதானாலும், அதற்குத் திறன்பேசிகள் அல்லது கணினிகள் வேண்டும், குடும்ப உறுப்பினர்களின் இறப்பால் பல குழந்தைகள் இன்று அநாதைகள் ஆகியுள்ளனர், வேலையிழந்து, உணவுக்கு வழியில்லாமல், இன்று தற்கொலைகள் அதிகரித்து வருகின்றன.

இந்த கொரொனா தொற்றின் நீண்டகால பாதிப்புகள் என்னவென்பதை நம்மால் முழுமையாக கணிக்க முடியாவிட்டாலும், ஓரளவுக்காவது அதன் பாதிப்புகளை நம்மால் உணர முடிகிறது. முக்கியமாக இன்றை இளைய தலைமுறையினர் மீதான தாக்கம் மிகவும் மோசமானதாகவே இருக்கும். இந்தக் கொரோனா இன்னும் பல வருடங்கள் நீடிக்கக் கூடியதாக இருந்தாலும், அது தோய்ந்து போவதற்குள் வேறு பல தொற்றுகளும் உண்டாக வாய்ப்புகள் உண்டு. மனிதர்கள் இன்று சுகாதாரம், மருத்துவம் போன்றவற்றில் நம்பிக்கை வைத்தாலும் கடவுள் நம்பிக்கை எனும் புளியங்கொம்பில் தங்களின் முழு நம்பிக்கையை வாக்காத வரை உலகில் இத்தகைய நோய்களும் தொல்லகளும் உண்டாகிக் கொண்டேதான் இருக்கும்.

நீ உன்னையே துறந்து என்பால் திரும்பும் வரை, உனக்கு அமைதி கிடையாது; யான் தனியனாகவும், இருப்பனவற்றிற்கெல்லாம் மேலாகவும் நேசிக்கப்படுவதையே விரும்புவதனால், உனது சொந்தப் பெயரிலல்லாது எனது பெயரில் பெருமை கொள்வதுவும், உன்னிலல்லாது என்னில் நம்பிக்கை வைப்பதுவுமே உனக்குப் பொருத்தமாகும். -பஹாவுல்லா



29 ஜூன் 2021


ஒட்டாவா, கனடா, 29 ஜூன் 2021, (BWNS) – ஆளுகைக்கு சமயத்தின் பங்கு பற்றிய ஒரு அரிய உரையாடலில், கெனேடிய நாடாளுமன்ற உறுப்பினர்கள் மற்றும் நாட்டின் மத சமூகங்களின் பிரதிநிதிகள் சமீபத்தில் அனைத்து கட்சி நாடாளுமன்ற இடைக்கால மாநாட்டின் தொடக்கக் கூட்டத்தை நடத்தினர் – இது, நாடு எதிர்கொள்ளும் சவால்களைப் பற்றிய ஆய்வில் சமய கொள்கைகளும் நுண்ணறிவுகளும் எவ்வாறு பங்களிக்கக்கூடும் என்பதை ஆராய்வதற்கான ஒரு புதிய தளமாகும்.

“நாம் யார், எவற்றிற்கு மதிப்பளிக்கிறோம் என்பதை மதம் வரையறுக்கிறது என்பதில் எனக்கு நம்பிக்கை உண்டு மற்றும், மாற்றத்திற்காக நாம் அறிவூட்டும் ஒரு வாகனமாக இருக்கும் ஜனநாயகமானது பெரும்பாலும் இந்த விழுமியங்களால் வழிநடத்தப்படுகிறது” என கெனேடிய செனட் சபையின் உறுப்பினரான மொபினா ஜாஃபர் கூறினார்.

சமீபத்தில் உருவாக்கப்பட்ட அனைத்து-கட்சி கோக்கஸ் (மாநாடு) கெனடாவின் தேர்ந்தெடுக்கப்பட்ட ஹவுஸ் ஆஃப் காமன்ஸ் உறுப்பினர்களுக்குத் திறக்கப்பட்டுள்ளது மற்றும் நியமிக்கப்பட்ட செனட் மற்றும் கெனேடிய சமய நல்லிணக்க உரையாடலின் (சிஐசி) ஆதரவுடன் ஏற்பாடு செய்யப்பட்டுள்ளது. இதில் கெனடாவின் பஹாய் சமூகமும் உறுப்பினராக உள்ளது.

“தொற்றுநோய் அரசாங்கத்திற்கும் மத சமூகங்களுக்கும் இடையில் புதிய வகையான உரையாடல்களை உருவாக்கியுள்ளது” என்று கெனேடிய பஹாய் பொது விவகார அலுவலகத்தின் ஜெஃப்ரி கேமரூன் கூறினார். “இது அவர்களின் சமூகத்திற்குச் சேவை செய்ய மக்களை ஊக்குவிப்பதில் மதம் தொடர்ந்து வகிக்கும் முக்கிய பங்கைத் தலைவர்களுக்கு மேலும் உணர்த்தியுள்ளது.”

முன்னாள் எம்.பி.யும் அமைச்சரவை அமைச்சருமான ஸ்டாக்வெல் டே, குறிப்பாக நெருக்கடிமிக்க காலங்களில், ஆறுதலையும் நம்பிக்கையையும் கொண்டுவருவதற்கான மதத்தின் சக்தி குறித்து பேசினார். “நமது சமுதாயத்தில் மதம் குறித்த எண்ணமானது, அது ஒரு தலைவரின் மீது கட்டுப்பாடு கொண்டுள்ளது என்பதையும், தன்னை விட அல்லது தாம் தொடர்புகொண்டுள்ள குழுவைவிட ஒரு மகா சக்தி உள்ளது என்னும் சாத்தியத்தினாலும் அவருள் ஒருவித பணிவு இருக்க வேண்டும்

கடந்த டிசம்பரில், கனடா முழுவதிலும் உள்ள பஹாய் தேசிய ஆன்மீக சபை மற்றும் உள்ளூர் ஆன்மீக சபைகளின் உறுப்பினர்கள் உட்பட பலதரப்பட்ட மதத் தலைவர்கள் பிரதமர் ஜஸ்டின் ட்ரூடோவைச் சந்தித்து, தொற்றுநோய்களின் பின்னணியில் மத சமூகங்களின் பங்களிப்பு குறித்து பேசினர்.

தொடர்ந்து அவர்: “தனிநபர்களுக்கு மத உணர்வு இருந்தால், நம்மைவிட மகத்தான ஒன்று இருக்கின்றது எனும் போது – அது ஓர் ஆறுதலளிக்கும் உணர்வை எற்படுத்துகிறது.

“எனவே இது ஓர் அரசியல் அமைப்பினுள் மில்லியன் கணக்கான குடிமக்கள் மீதான பரவலை நாங்கள் கற்பனை செய்கிறோம், அவர்களில் கணிசமான பகுதியினர் உண்மையில் அங்கே கடவுளின் சக்தி இருப்பதாக நம்புகிறார்கள், [அவர்கள்] பெரும் மரியாதை உணர்வுடன் வாழ்வதுடன், ஒருவருக்கொருவர் அன்பு பாராட்டுகின்றனர் என நாம் நம்புகின்றோம்.”

தனிநபர் உத்வேகத்திற்கும் அப்பால், கோட்பாடு வகுக்கும் செயல்முறைக்கு மதம் முக்கிய பங்களிப்புகளை வழங்க முடியும் என பங்கேற்பாளர்கள் வலியுறுத்தினர்.

நாடாளுமன்ற உறுப்பினர் கார்னெட் ஜெனுயிஸ் கூறுகையில், “மதத்தில் மிக முக்கியத்துவம் வாய்ந்த இரண்டு கருத்துக்கள் உள்ளன: ஒன்று அன்பு, மற்றொன்று உண்மை. அந்த இரண்டு கருத்துக்களும் ஒன்றாகச் கைகோர்த்துச் செல்ல வேண்டும். உங்களிடம் அன்பு இருந்து, ஆனால் உண்மை உணர்வு இல்லையெனில்,… உண்மையில் என்ன நடக்கிறது அல்லது ஒருவரின் உண்மையான தேவைகள் என்ன என்பதை நீங்கள் புரிந்து கொள்ள மாட்டீர். உங்களுக்கு சத்தியத்தைப் பின்தொடரும் ஓர் உணர்வு இருந்து, ஆனால் செயல்பாட்டில் எந்த அன்பும் இல்லையெனில், அதுவும் தெளிவாகவே ஒரு குறைபாடாகும்… அன்பு என்பது கடுமையான அநீதியை எதிர்கொள்ள தயாராக இருப்பதாகும். ”

அனைத்து தரப்பு இடைக்கால கோக்கஸ் மாநாட்டின் எதிர்காலம் குறித்து செய்தி சேவையுடன் பேசிய பஹாய் பொது விவகார அலுவலகத்தின் டாக்டர் கேமரூன் இவ்வாறு கூறுகிறார்: “கொள்கை வகுப்பாளர்கள் மற்றும் சமய சமூகங்களிடையே புதிய உறவுகளை வளர்ப்பது மற்றும் உரையாடல்களை உருவாக்குவதுடன், ஒவ்வொரு சிக்கலையும் ஒர் இரும (பைனரி) தேர்வாக வடிவமைப்பதை விட, பயனுள்ள ஆராய்வின் மூலம் மக்கள் தங்கள் சிந்தனையில் கூட்டாக முன்னேற முடியும். “”மனிதகுலத்தின் இன்றியமையாத ஒற்றுமையின் பஹாய் கொள்கை சமுதாயத்தில் மதத்தின் பங்கு பற்றிய சொற்பொழிவுக்கு அலுவலகத்தின் பங்களிப்புகளுக்கு அடிப்படையானது,” என்று அவர் தொடர்ந்து கூறினார். இந்த கோக்கஸ், அதன் ஆரம்ப கட்டங்களில் இருந்தாலும், அந்தக் கொள்கையின் வெளிப்பாடு மற்றும் அதிக சமூக ஒற்றுமைக்கான ஓர் எடுத்துக்காட்டாக இருக்கின்றது.”

மூலாதாரம்: https://news.bahai.org/story/1516/