Feeds:
பதிவுகள்
பின்னூட்டங்கள்

Posts Tagged ‘பெண்கள்’


அவளுக்குஅவன் (HeForShe) – 20 செப்டம்பர் 2014ல் எம்மா வாட்ஸன் (Emma Watson)  ஐநா-வில் ஆற்றிய ஓர் உரை

<http://www.heforshe.org/&gt;

(இது ஒரு தற்காலிக மொழிபெயர்ப்பு)

இன்று, HeForShe எனப்படும் ஓர் இயக்கத்தை ஆரம்பிக்கின்றோம். எங்களுக்கு உங்கள் உதவி தேவைப்படுவதால் உங்களை அணுகுகின்றோம். மாற்றத்திற்கான பேச்சாளர்களாக முடிந்த அளவு அதிகமான முதிய மற்றும் இளம் ஆண்களைத் திரட்ட வேண்டும். அதைப் பற்றி பேசிக்கொண்டிருக்க மட்டும் முடியாது. அதை நடைமுறையான ஒன்றாக ஆக்கிட நாங்கள் முயலுகின்றோம். ஐநா-வின் நல்லெண்ணத் தூதுவராக நான் ஆறு மாதங்களுக்கு முன் நியமிக்கப்பட்டேன்

பெண்ணியம் (feminism) குறித்து நான் அதிகமாகப் பேசப் பேச, பெண்கள் உரிமைக்காகப் போராடுவது பெரும்பாலும் ஆண்களை-வெறுத்தல் என்பதன் இணைபொருளான ஒன்றாக ஆகிவிட்டது. ஒன்று மட்டும் எனக்கு உறுதியாகத் தெரிகிறது, இந்த நிலைமை ஒரு முடிவிற்கு வரவேண்டும். பெண்ணியம் என்பது பெண்களுக்கும் ஆண்களுக்கும் சமவுரிமையும் வாய்ப்பும் வழங்கப்பட வேண்டும் என்பது இங்கு குறிப்பிடப்பட வேண்டும். இதுவே அரிசியல், பொருளாதார மற்றும் சமூக நிலையிலான பாலின சமத்துவம் குறித்த கோட்பாடாகும்.

எங்களின் பெற்றோருக்காக ஒரு நாடகத்தை நானே இயக்க விரும்பியதால் எனது 8 வயதில், நான் போஸ்ஸியாக (bossy) இருக்கின்றேன் என்றனர். எனக்கு 14 வயதானவுடன், ஊடகத்தின் சில பகுதியினர் என்னை பாலியல் பகுப்பிற்கு உட்படுத்தப்படுத்திட ஆரம்பித்தனர். எனது 15 வயதில் என் தோழிகள், ஆண்மைத்தனத்தோடு தங்களைக் காண்பித்துக்கொள்ள விரும்பாமல் விளையாட்டுக் குழுக்களிலிருந்து விலக ஆரம்பித்தனர். என் 18 வயதில் என் ஆண் தோழர்கள் தங்கள் உணர்வுகளை வெளிப்படுத்திட முடியாமல் தவித்தனர்.

harry-reliquias-806

ஆகவே, நான் ஒரு பெண்ணியல்வாதி என நான் முடிவு செய்தேன். அது சிக்கலான ஒன்றென எனக்குப் படவில்லை. ஆனால் நான் சமீபமாக மேற்கொண்ட ஆய்வின்படி பெண்ணியம் என்பது ஒரு வேண்டத்தகாத வார்த்தையாக ஆகியுள்ளது தெரியவருகின்றது. பெண்கள் தங்களை பெண்ணியல்வாதிகளாகக் காண்பித்துக்கொண்டிட விரும்புவதில்லை. உண்மையில் பெண்ணிய வெளிப்பாடு வன்மைமிக்க, அடாவடியான, தனிமைப்படுத்துகின்ற மற்றும் ஆண்-எதிர்ப்பாகவும் கவர்ச்சியற்ற ஒன்றாகவும் கருதப்படுகின்றது.

இந்த வார்த்தை ஏன் மனதில் ஓர் அசௌகர்ய உணர்வைத் தோற்றுவிக்கவேண்டும்? என் ஆண் சகப்பணியாளர்களுக்குச் சமமாக எனக்கு ஊதியம் வழங்கப்படுவது நியாயமே என நான் நினைக்கின்றேன். என் உடல் குறித்த சொந்த முடிவுகளைச் செய்திடும் உரிமை எனக்கு வேண்டு. என் வாழ்வைப் பாதிக்கக்கூடிய தீர்மாணங்களிலும் முடிவுகளிலும் பெண்கள் சம்பந்தப்பட்டிருப்பது சரியே. சமூக ரீதியில் ஆண்களைப் போன்றே எனக்கும் சம மரியாதை வழங்கப்படுவது சரியே.

ஆனால் துரதிர்ஷடவசமாக, பெண்கள் இவ்வுரிமைகள் அனைத்தையும் அனுபவிக்கக்கூடிய ஒரு நாடு கூட இவ்வுலகில் இல்லை என்றே நான் கூறுவேன். பாலின சமத்துவத்தை அடைந்துவிட்டதாக எந்த ஒரு நாடும் இன்று கூறிக்கொள்ள முடியாது. இவ்வுரிமைகள் மனிதவுரிமைகளைச் சார்ந்தவை, ஆனால் நான் மட்டும் அதிர்ஷ்டம் செய்தவளாக இருக்கின்றேன்.

நான் ஒரு பெண்ணாகப் பிறந்ததினால் என் பெற்றோரின் அன்பு எனக்கு எவ்விதத்திலும் குறைந்துவிடவில்லை. அவ்விதத்தில் நான் கொடுத்து வைத்தவள். நான் பெண் என்பதால் என் பள்ளி வாழ்க்கையும் ஓர் எல்லைக்குட்படவில்லை. எனது அறிவுறையாளர்கள் வருங்காலத்தில் நான் ஒரு தாயாகும் சாத்தியத்தினால் வாழ்க்கையில் நான் பெரும் சாதனைகள் புரிந்திட முடியாது என்று நினைக்கவில்லை. இச்சூழல்களே இப்போது நான் அடைந்துள்ள மேம்பாட்டிற்கான பால்மை சமத்துவத்திற்கான பாலங்கள். அவர்களுக்கு அது தெரியாதிருக்கலாம், ஆனால் அவர்களே இன்று உலகிற்குத் தேவைப்படும் மற்றும் தெரியாமலேயே செயல்படும் பெண்ணியர்களாவர். இவர்கள் மேலும் அதிகமாத் தேவைப்படுகின்றனர்.

பெண்ணியம் எனும் வார்த்தை இன்னமும் உங்கள் மனதில் ஓர் அசௌகர்யத்தை ஏற்படுத்தினாலும் அவ்வார்த்தையானது முக்கியமன்று. அதன் கருத்தும் அதன் பின்னணியில் வீற்றிருக்கும் பேரார்வமுமே முக்கியமாகும், ஏனெனில் நான் பெற்றிட்ட அதே உரிமைகளை எல்லா பெண்களுமே பெற்றிடவில்லை. வெகு சிலரே அந்நிலையை அடைந்துள்ளனர்.

1997ல் பெய்ஜிங் நகரில் பெண்கள் உரிமை குறித்து ஹில்லரி கிலின்டன் ஒரு பிரபலமான உரையாற்றினார். துரதிர்ஷ்ட வசமாக, அவர் அன்று கோரியிருந்த மாற்றங்கள் இன்றும் தேவைப்படுகின்றன. அக்கூட்டத்தில் ஆண்களின் பங்கேற்பு 30 விழுக்காட்டிற்கும் குறைவாகவே இருந்தது. ஆகவே, உலகின் பாதி மட்டுமே அவ்வுரையாடலில் பங்கேற்றிட அழைக்கப்படுகையில் அல்லது வரவேற்கப்படுவதாக உணரும் நிலையில் உலகில் மாற்றங்களைக் கொண்டுவருவது எவ்வாறு?

ஆண்களே, இவ்வாய்ப்பைப் பயன்படுத்தி உங்களுக்கு முறைப்படியான அழைப்பு ஒன்றை விடுக்கின்றேன். பால்மை சமத்துவம் உங்களையும் சார்ந்த ஒரு பிரச்சினையாகும். ஏனெனில், பெற்றவர் எனும் முறையில் என் தந்தையின் பங்கு சமுதாயத்தால் சற்று குறைவாகவே மதிப்பிடப்படுவதை நான் காண்கின்றேன். மனநோய்க்கு ஆளான ஆண்களைக் கண்டிருக்கின்றேன். அவர்கள் தங்களின் ஆண்மைக்குப் பங்கம் விளைந்துவிடுமோ எனும் உணர்வில் உதவி கேட்க முடியாமல் தவிக்கின்றனர். பொருண்மையாக, ஐக்கிய அரசில் (UK) 20லிருந்து 49 வயதுக்கு உட்பட்டோரின் மரணத்திற்குச் சாலைவிபத்துகள், புற்றுநோய், இருதயநோய் ஆகியவற்றிற்கும் மேற்பட்டு தற்கொலையே முக்கிய காரணமாக இருக்கின்றது. ஆண்மையின் வெற்றி என்கையில்,  நலிந்துபோன மற்றும் மனவுறுதியற்ற ஆண்களை நான் கண்டிருக்கின்றேன். ஆண்களுக்கும் சமத்துவத்தின் பலன்கள் கிடையாது.

ஆண்களும் ஆண் பால்மைத்தன்மைக்கு அடிமைப்பட்டுள்ளதாக நாம் பெரும்பாலும் கூறுவதில்லை, ஆனால் அவர்கள் அவ்வாறு அடிமைப்பட்டுள்ளார்கள் என்பதே உண்மை. அவர்கள் அதிலிருந்து விடுபடும்போது, அதன்விளைவாகப் பெண்கள் நிலையும் இயல்பாகவே மாற்றம் காணும். ஆண்கள் தங்கள் நிலையை நிலைநாட்டிக்கொள்ளக் கடுமையாக நடந்துகொள்ளவிட்டால் பெண்களும் கீழ்ப்படிந்திட வற்புறுத்தலுக்கு உட்பட வேண்டியதில்லை. ஆண்கள் கட்டுப்படுத்த வேண்டியதில்லை எனும்போது, பெண்களும் கட்டுப்படுத்தப்பட வேண்டியதில்லை.

ஆண் பெண் இருவருமே உணர்திறத்தில் தயக்கம் காண்பிக்கக்கூடாது. இருவரும் உறுதிப்பாடு உடையவர்களாக இருக்கவேண்டும். பால்மையை நேரெதிரான இரண்டு இலட்சியத் தொகுப்புகளாகக் காண்பதினின்று அதை ஒரு நிறமாலையாகக் (spectrum) காணவேண்டிய காலம் கனிந்துவிட்டது. நாம் யாராக இல்லையோ அதை விடுத்து நாம் யார் என்பதைக் கொண்டே நம்மை நாம் வரையறுத்துக்கொள்ள வேண்டும். நாம் அனைவரும் மேலும் சுதந்திரமாக இருக்கலாம், இதுவே “அவளுக்குஅவன்” என்பதின் கருப்பொருளாகும். அது சுதந்திரம் பற்றியது. ஆண்கள் இந்நிலையை அடைந்திட வேண்டும். அதன் மூலம் அவர்களின் மகள்களும் சகோதரிகளும் தாய்மார்களும் தப்பெண்ணங்களிலிருந்து விடுபடுவதோடு அவர்களின் மகன்களும் இழகியமனம் பெறவும் மனிதர்களாகச் செயல்படவும் வாய்ப்புகள் பெற்றும் தாங்கள் இயல்பாகப் பெற்றிரிருந்தும் கைவிட்டுமிருந்தவற்றை மீண்டும் பெற்றும் அதன்மூலம் தங்களின் உண்மையான மற்றும் பூரணமான நிலையை அடையலாம்.

இந்த ஹேரி பொட்டர் பெண் யார் என நீங்கள் நினைக்கலாம். இவளுக்கு ஐ;நாவில் என்ன வேலை? நானும் எனக்கு நானே அதே கேள்வியைத்தான் கேட்டு வந்துள்ளேன். எனக்குத் தெரிந்ததெல்லாம், இப்பிரச்சினை குறித்து நான் அக்கறை கொண்டுள்ளேன் மற்றும் அதை சரிபடுத்திடவும் விரும்புகின்றேன். வாழ்க்கையில் நான் கண்டுள்ளவற்றின் அடிப்படையில், வாய்ப்பளிக்கப்படுமானால், என் பங்கிற்கு நானும் எனக்குத் தெரிந்ததைக் கூறு விரும்புகின்றேன். நல்ல ஆண்கள், பெண்கள் ஆகியோரின் செயல்படாமையே தீய சக்திகள் வெற்றிபெறுவதற்குத் தேவையான சூழலாகும் என அரசியல் மூதறிஞரான எட்மன்ட் பர்க் கூறியுள்ளார்.

இவ்வுரைக்காக நான் நடுங்கியும் நம்பிக்கையிழந்திருந்தபோது, நானின்றி வேறு யார் என எனக்கு நானே கூறிக்கொண்டேன். இப்பொழுதில்லாவிட்டால் எப்பொழுது? வாய்ப்புகள் ஏற்படும்போது சந்தேகங்கள் எழுகையில் அவ்வார்த்தைகள் உபயோகமாக இருக்கும் என நான் நம்புகின்றேன். நாம் ஒன்றும் செய்யாது இருந்தால் ஒரே விதமான பணிக்கு, பெண்கள் ஆண்களுக்குச் சமமான ஊதியம் பெறுவதற்கு இன்னும் 75 அல்லது 100 ஆண்டுகள் கடந்திடலாம் என்பதே உண்மை. அடுத்த 16 வருடங்களுக்குள் 15.5 மில்லியன் பெண் பிள்ளைகள் பால்ய விவாகத்திற்கு உட்படுத்தப்படுவார்கள். இப்போதுள்ள நிலையில், ஆப்பிரிக்கப் பெண்கள் அனைவரும் உயர்நிலை கல்வி பெறுவதற்கு வருடம் 2086 ஆகிவிடும்.

நீங்கள் பால்மை சமத்துவத்தை விரும்புகிறவர் என்றால் நான் ஏற்கனவே கூறிய, அதிர்ஷ்டவசமாக உதித்த பெண்ணியவாதிகளுள் நீங்களும் ஒருவராக இருக்கக்கூடும். அதற்காக நான் உங்களை வாழ்த்துகின்றேன். நாம் ஓர் ஒற்றுமையான உலகிற்காகப் பாடுபட வேண்டும். இதில் ஒரு நற்செய்தி என்னவென்றால் நமக்கு அதற்கான ஒரு தளம் அமைத்துள்ளது. <http://www.heforshe.org/>அதுதான் “HeForShe” என அழைக்கப்படுகின்றது. முன்னெழுந்து, முன்வந்து, நான் இல்லையெனில் வேறு யார்? இப்பொழுது இல்லையெனில் வேறு எப்பொழுது? என உங்களை நான் கேட்கின்றேன்.

இதுபோன்ற கருத்தில் ஓர் உரை: http://goo.gl/D8Scpd

Advertisements

Read Full Post »


தாஹிரி அல்லது குர்ராத்து’ல்-அய்ன் பஹாய் சமயத்தின் இரட்டை அவதாரங்களுள் முன்னோடி அவதாரமான பாப் அவர்களின் பதினெட்டு சீடர்களில் ஒருவராவார். உலகில் பெண்களின் உரிமைக்காக போராடியோர் பட்டியலில் முதன்மையாக இருப்போரில் இவரும் ஒருவர். பாப் அவர்களின் சிஷ்யை எனும் முறையில் பாரசீக அரசினால் இவர் மரணதண்டனைக்கு உட்படுத்தப்பட்டு இறந்தவுடன் அவருடைய பிறப்பு விவரங்கள் அழிக்கப்பட்டன.இவர் 1817 – 1820க்குள் பிறந்தவராக இருக்கக்கூடும்.

பாரசீக நாட்டு பெண்களுக்கு அக்காலத்தில் எவ்வித சுதந்திரமும் கிடையாது. சிறுவயதிலேயே திருமணத்திற்கு உட்படுத்தப்பட்டு பிள்ளைகள் பெறுவது கனவனுக்கு சேவை செய்வது தவிர வேறு எந்த உரிமையும் அவர்களுக்கு கிடையாது. முதலில் அவர்களைப் பெற்ற தந்தைகளுக்குக் கீழ்ப்படிந்தும் பிறகு அவர்களின் கனவர்களுக்குக் கீழ்ப்படிந்தும் வாழ்வது அவர்களுடைய வாழ்க்கையாக இருந்தது. சதா கருப்பு நிற சடோர் அல்லது முகம் உட்பட உடல் முழுவதையும் மூடியிருக்கும் ஒரு வித ஆடையை அவர்கள் அனிந்திருப்பார்கள். அவர்களின் முகங்களை அவர்களின் குடும்பத்தைச் சார்ந்த ஆண்களைத் தவிர வேறு ஆண்கள் யாரும் பார்க்கமுடியாது. கல்வியறிவுக்குக் கூட அவர்களுக்கு வழியில்லை.

இத்தகைய சூழ்நிலையில் பிறந்து வளர்ந்த தாஹிரி சிறுவயது முதற்கொண்டே தனிசிறந்து விளங்கினார். அவருடைய அறிவாற்றலைக் கண்ட அவருடைய தந்தை “இவள் மட்டும் ஆணாகப் பிறந்திருந்தாள், அவன் என் குடும்பத்தின் மீது ஒளிவீசச் செய்து, எனக்குப் பிறகு என் வாரிசாகி இருப்பான்”, என்றார்.

அக்காலத்தில் பாஹ்ரேய்ன் தீவுகளில் ஒன்றில் வாழ்ந்த ஷேய்க் அஹ்மத் என்பார் புது அவதாரம் ஒன்று விரைவில் தோன்றவிருப்பதை தமது ஆன்மீக அறிவினால் உணர்ந்து அதை தம்மைச் சுற்றியுள்ளோருக்கு போதித்தும் வந்தார். தமக்குப் பிறகு தமது போதனைகளை தொடர்ந்து உலக மக்களுக்கு அறிவுறுத்திட சையிட் காஸிம் என்பாரை தமது வாரிசாக நியமித்தார். அவ்வேளையில்தான் தாஹிரி சையிட் காஸிம் பற்றி கேள்விப்பட்டு அவர் வாழ்ந்த கர்பலா நகருக்கு தமது கனவர் மற்றும் தகப்பனாரின் விருப்பத்திற்கு எதிராக சையிட் காஸிமோடு தொடர்பு கொண்டு அவரை சந்திக்கவும் சென்றார். ஆனால், துரதிர்ஷ்ட வசமாக தாஹிரி அங்கு சென்றடைவதற்கு முன்பாக சையிட் காஸிம் மரணமுற்றிருந்தார். அங்கு சென்ற பிறகு பாப் அவர்களைப் பற்றி கேள்விப்பட்டு அவருடைய படைப்புகளையும் தாஹிரி படித்துணர்ந்தார். அதன் பிறகு பாப் அவர்களின் போதனைகளை மிகவும் வன்மையுடன் தாம் சென்றவிடங்களில் எல்லாம் போதித்தார்.

1848ம் ஆண்டிற்கு முன்பே பாப் அவர்கள் தமது போதனைகளுக்காக கைது செய்யப்பட்டிருந்தார். அவ்வேளையில் படாஷ்ட் எனும் இடத்தில் பாப் அவர்களின் முக்கிய சீடர்கள் பலர் அவ்வருட ஜூன் மற்றும் ஜூலை மாதங்களில் ஒரு மாநாட்டை ஏற்பாடு செய்திருந்தனர். அம்மாநாடு பாப் அவர்களின் சமயம் ஒரு சுதந்திரமான சமயம் மற்றும் சிறைவாசம் அனுபவித்த பாப் அவர்களை எவ்வாறு விடுவிப்பது என்பது குறித்து ஏற்பாடு செய்யப்பட்டிருந்தது. இம்மாநாட்டின்போதுதான் தாஹிரி எனும் பெயர் அவருக்கு பஹாவுல்லா அவர்களால் வழங்கப்பட்டது. மாநாட்டின் ஒரு நாளின்போது தாஹிரி பாப் அவர்களின் சமயத்தில் பெண்களுக்கு வழங்கப்பட்டிருந்த சம உரிமையை அங்கு கூடியிருந்தோருக்கு திடுக்கிம் வகையில் வெளிப்படுத்தினார். அவர் அங்கு கூடியிருந்த ஆண்களின் முன்னிலையில் தமது முகத்திரையை திடீரென அகற்றினார். இன்னமும் பழைய சம்பிரதாயங்களில் மூழ்கியிருந்த பல பாப்யிக்கள் மரண தண்டனைக்கு வழி வகுக்கும் அச்செய்கையை கண்டு பொறுக்க முடியாமல் பாப் அவர்களின் சமயத்திலிருந்தே விலகினர். அதில் பெரிதும் திடுக்கிட்டிருந்த ஒருவர் தமது கழுத்தை சொந்தமாகவே அறுத்துக் கொண்டார். உலகிலேயே பெண்கள் உரிமையை முதன் முறையாக பரைசாற்றியவர் தாஹிரியே ஆவார். இச்சம்பவம் நடக்கும் வேளையில் எலிஸபெத் கேடி ஸ்டேன்டன் எனும் பெண்மனி செனெக்கா போல்ஸ் மாநாட்டிற்கு பெண்களின் உரிமை குறித்த பிரகடனம் ஒன்றை வெளிப்படுத்தும் “Declaration of Sentiments” எனும் அறிக்கையை எழுதிக்கொண்டிருந்தார்.

தாஹிரி அம்மையார் சிறிது காலத்திற்குள் தமது நம்பிக்கைக்காக மரணதண்டனை வழங்கப்பட்டு கழுத்து நெறிக்கப்பட்டு இறந்தார். அவர் கொல்லப்படுவதற்கு முன் ,”நீங்கள் என்னை கொல்வதற்கு விரும்பலாம், ஆனால் பெண்களின் விடுதலையை உங்களால் தடுக்க முடியாது.” என கூறியவாறே கொல்லப்பட்டார். தாஹிரியின் வாழ்க்கை மற்றும் அவருடைய வைரியம் இன்றும் பல கவிதைகளுக்கும், நாடகங்களுக்கும் மற்றும் உலகளாவிய கருத்துக்களுக்கும் உற்சாக உணர்வை அளிக்கின்றது. அவர் பாரசீக நாட்டில் மட்டும் பிரபலமாக இருக்கவில்லை. மாறாக, அவர் பாக்கிஸ்தான், இந்தியா மற்றும் மேற்கத்திய நாடுகளிலும் பிரபலமாக இருந்தார். பெண்கள் உரிமைக்காக முதன்முதலாக உயிர்த்தியாகம் செய்தவரான தாஹிரி பற்றி கேள்விப்பட்ட ஆஸ்த்திரியா நாட்டின் ஜனாதிபதி ஒருவரின் தாயார், “பாரசீக நாட்டின் பெண்களுக்காக தாஹிரி தமது உயிரை எதற்காக தியாகம் செய்தாரோ அதே காரியங்களை நான் ஆஸ்த்ரிய நாட்டின் பெண்களுக்கு செய்வேன்,” என்றாராம்.

பிரான்ஸ் நாட்டின் ‘Journal Asiatique’ எனும் 1866ம் ஆண்டு பிரசுரத்தில் தாஹிரி குறித்து பின்வருமாறு கூறப்படுகிறது: “பாரசீக நாட்டில் அதிகாரமே இல்லாத அபலைகளாக அந்த நாட்டு பெண்கள் அனைவரும் இருக்கையில், ஒரு பெண் அதுவும் அரசாங்கத்தையும் மக்களையும் தங்கள் ஆற்றலின் கீழ் அவர்கள் எண்ணிக்கையினாலும் முக்கியத்துவத்தினாலும் தங்கள் கட்டுப்பாட்டில் வைத்துள்ள மதகுருக்கள் வாழும் காஸ்வின் போன்ற ஒரு நகரில், எவ்வாறு ஒரு பெண் இத்தகைய சக்தி வாய்ந்த ஒரு சமயப்பிரிவை உருவாக்கியிருக்க முடியும்? பலரை வியக்கச் செய்துள்ள ஒரு முக்கிய கேள்வி இதுவே ஆகும்…” இந்திய நாட்டின் தலை சிறந்த பெண்மனிகளுள் ஒருவரான சரோஜினி நாயுடு அவர்கள், தாஹிரி பற்றி நன்கு அறிந்திருந்து அவருடைய கவிதைகளையும் ஒரு இரான் நாட்டு நண்பரின் வாயிலாக பெற்றிருந்தார்.

தாஹிரி கொல்லப்படுவதற்கு முன், அதற்கு முதல் நாள் அவர் பாரசீக அரசனான நாஸ்ரிட்டின் ஷா-வின் முன்னிலைக்கு விசாரனைக்காக கொண்டுசெல்லப்பட்டார். அதற்கு முன்பாகவே ஷா மன்னன் தாஹிரி பற்றி கேள்விப்பட்டிருந்தான். அவருடைய ஆற்றலை பற்றி அறிந்திருந்த மன்னன் தாஹிரி பாப் அவர்களின சமயத்தை விடுத்து மறுபடியும் ஷீயா மார்க்கத்தை தழுவினால் அவரை தமது அரண்மனையில் பெண்கள் பகுதியில் ஒரு முக்கிய அதிகாரியாக நியமிப்பதாகவும், ஏன், அவரை தமது மனைவியாகவும் ஆக்கிக்கொள்வதாக கூறினான். ஆனால் அதற்கு தாஹிரி:

அரசு, செல்வம் ஆட்சி உமக்கே உரியதாகட்டும்
தேசாந்திரமும், ஏழை ‘தர்வேஷ்’ ஆவதும் பேரபாயமும் எனதாகட்டும்
அந்த நிலை நல்லதென்றால், அது உமக்காகட்டும்
இந்த நிலை தீயதென்றால், நான் அதற்காக ஏங்குகின்றேன்; அது எனதாகட்டுமாக!

அதைப் படித்த ஷா மன்னன் இத்தகைய ஒரு பெண்ணை வரலாறு இது வரை நமக்கு வெளிப்படுத்தியதில்லை என்றானாம்.

ஷா மன்னன் தாஹிரியை நேரில் கண்டபோது, “நீ ஏன் பாப் அவர்களில் விசுவாசியாக இருக்கவேண்டும்?” என கேட்டானாம். அதற்கு தாஹிரி ஏறக்குறைய பின்வருமாறு பதிலளித்தாராம்:

நீர் வழிபடுவதை நான் வழிபடவில்லை
நான் வழிபடுவதை நீர் வழிபடவில்லை
நீர் வழிபடுவதை நான் வழிபடப்போவதில்லை
நான் வழிபடுவதை நீரும் வழிபடப்போவதில்லை
உமக்கு உமது சமயம், எனக்கு எனது சமயம்.

தாஹிரி கொல்லப்பட்டாலும் அவர் ஆரம்பித்து வைத்து பெண்கள் உரிமை போராட்டம் தொடர்ந்து மேலும் வலுவடைந்தே வந்துள்ளது, மேலும் பெண்கள் முழு சுதந்திரம் அடையும் வரை தொடர்ந்து வலுவடையும்.

Read Full Post »


விதிவிலக்கு

பாஹிய்யா நாக்ஜவானி

விதிவிலக்கென்பது ஒரு சலுகையைக் குறிக்கின்றது. பொதுவாகவே விருப்பமில்லாத மற்றும் சுமையான ஒரு செயலை ஆற்றுவதிலிருந்து விலக்களிக்கப்படுவதையே ஒரு சலுகையெனக் கூறலாம். இதுவே ஒரு விதிவிலக்கில் உள்ளடங்கிக் கிடக்கும் எண்ணமாகும்: அது சலிப்பு தரும் கடமை ஒன்றிலிருந்து விதிவிலக்களிக்களிக்கப்படும் சலுகையாகும்.

நாம் எல்லாருமே சலுகைகளை விரும்புகிறோம். வீட்டுப்பாடம் செய்வதிலிருந்து குழந்தைகள் விதிவிலக்கை விரும்புகின்றனர். உதாரணமாக, உடல் நலமற்றோ அல்லது நீண்ட காலத் துன்பத்தால் உடல் நலிவுற்றோ இருக்கும்போது, எங்கோ யாரோ அது குறித்து அறிவிக்கப்படுகிறார் என்பது மனதுக்கு இதமளிக்கின்றது; சமூகம் ஒருவருடைய சம்பளத்தைக் குறைக்காது அவர் வேலை செய்வதிலிருந்து விலக்களிப்பது; அதாவது, ஒரு முறை மருத்துவரால் வேலைவிலக்குச் சான்றளிக்கப்படும்போது, ஒருவர் மருத்துவக் காப்புறுதியும் சமூகக் காப்புறுதியும் பெற வாய்ப்புப் பெறுகிறார் என்பது. இராணுவச் சேவையிலிருந்து விதிவிலக்குப் பெறுவது பெரிதும் களிப்பு தரும் ஒன்று. அதேபோல் வருமான வரி விதிவிலக்குக் குறித்து சொல்லவே தேவையில்லை. சுருக்கமாகச் சொல்லப்போனால், எல்லா சூழ்நிலைகளிலும், விதிவிலக்கு தரும் சலுகையானது ஏதோ ஒரு சிறப்புப்பலன் அடையப்பட்டுள்ளதென்பதையே குறிக்கின்றது; ஓர் மாற்றுவழி அளிக்கப்பட்டுள்ளது என்பதைக் குறிக்கின்றது.

ஒரு கடமையை நிறைவேற்றுவதிலிருந்து மக்களை விடுவிக்கும் தனிப்பட்ட மற்றும் விதிவிலக்கைக் கோருவதுமான சூழ்நிலைகள் இருக்கக்கூடும் என்பதை நமது சமூகம் ஏற்க வேண்டும் என்பதை நாம் விரும்புகிறோம். ஒரு மாபெரும் சமூகத்தில் ஊர்பேர் தெரியாது போவதிலிருந்து பாதுகாப்புத் தரும், விதிவிலக்கை அனுமதிக்கும் சட்ட விதிமுறைகளை நாம் மதிக்கின்றோம்; விதிவிலக்குகள் தனிமனித உரிமைகளை வலியுறுத்துகின்றன. சிறப்புக் கவனம் அளிக்காமலும் சட்டத்தைத் துர்பிரயோகம் செய்வதிலிருந்தும் அவை நம்மைப் பாதுகாக்கின்றன.

அதே வேளை, ஒரு சலுகையும் துர்ப்பிரயோகம் செய்யப்படலாம். அது ஒருவருக்குத் தேர்வு செய்யும் உரிமையை மட்டுமல்லாமல் மக்களிடையே ஒரு சாராருக்குத் தனிச்சிறப்பையும் சேர்க்கின்றது: அதாவது இவர் இதைச் செய்யலாம், அவர் இதைச் செய்யமுடியாது என்பன போன்றவை.

தனிச்சிறப்பை உண்டாக்கும் எதுவுமே அதனோடு தப்பெண்ணங்களை, மனிதரால் உருவாக்கப்பட்ட இல்லாத வேறுபாடுகளை, உருவாக்கக்கூடிய சூழ்நிலைகளைத் தன்னோடு சுமந்துவரும். அது சலுகைகளை மட்டும் அளிக்கவில்லை ஆனால், அவற்றைச்சுற்றி சந்தேகமான யூகங்களையும் உருவாக்குகின்றது: நான் உனக்கு இந்த விதிவிலக்களித்தேனானால் அவ்விதிவிலக்கு தேவைப்படுமளவுக்கு நல்லதொரு காரணம் இருக்க வேண்டும். காரணங்கள் சுமத்தப்படாமலும் அவை வேண்டப்படுபவையாகவும் இருக்க வேண்டும். சலுகைகள் சிறப்புச் சூழ்நிலைகளை மட்டும் அனுமதிக்கவில்லை ஆனால் அவை தவறான முறைகளில் பயன்படுத்தப்படும் சூழ்நிலைக்கும் இட்டுச் செல்லக்கூடியன. உகந்த சூழ்நிலைகளிலும், சரியான காரணங்களுக்காகவும் சலுகைகளாவன அத்தியாவசியமாக இருப்பதைப் போலவே, தவறான சூழ்நிலைகளில் அவை பெரும் பாதகம் விலைவிக்கக்கூடியனவாகவும் இருக்கின்றன.

ஒரு விதிவிலக்கென்பது ஓர் உண்மையான சலுகையாக இருப்பதற்கு, அதைப் பெறக்கூடியோர் அச் சலுகையை நன்கு உணரவேண்டும். இல்லாவிடில், அவ்விதிவிலக்கு வேறெதுவுமாக மாறக்கூடிய அபாயமுள்ளது. அது ஒரு தடைவிதிப்பாக மாறிடக்கூடிய அபாயமுள்ளது. விதிவிலக்கு வழங்கப்பட்ட அதே மக்களுக்கெதிராக அதே விதிவிலக்குகள் பயன்படுத்தப்பட்டதன் காரணமாக படிப்படியாகத் தடைகளாக மாறிய சலுகைகள் ஆங்காங்கே மனிதசரித்திரத்தில் சிதறிக்கிடக்கக் காணலாம். ஒரு விதிவிலக்காகப்பட்டது ஒரு தடையாகவின்றி ஒரு சலுகையாக நல்ல முறையில் இயங்கிட சுமையானவையும், சிரமமானவையும், விரும்பத்தகாதவையும், எம்மக்களுக்கு அவை குறிப்பாக கஷ்டமாக இருக்கும் என்பது குறித்த சூழ்நிலைகள் பற்றியும் இணக்கம் காணப்பட வேண்டும். யாவற்றுக்கும் மேலாக, தாம் செய்ய விரும்பும் ஒரு காரியத்தைச் செய்வதினின்று மக்களுக்கு நாம் விதிவிலக்களிக்கக்கூடாது. தங்கள் சலுகைகளினின்று நாம் மக்களுக்கு விதிவிலக்களிக்க முடியாது. ஒரு சலுகையினின்று விதிவிலக்களிப்பதை ஒரு சலுகையெனக் கூறுவது பரிகாசமாக இருக்கும். புனித யாத்திரை செய்வதினின்று பெண்களுக்கு விதிவிலக்களிக்கப்பட்டுள்ளது என்பதை அதிப்புனித நூலில் நாம் காணும்போது, நிச்சயமாக பஹாவுல்லா அது குறித்து பரிகாசம் செய்யவில்லை என்பது நமக்குத் தெரியும். இது எனக்குப் புரியவில்லை. பொதுவாகவே சமய ரீதியில் புனித யாத்ரீகர்களுக்குப் புனித யாத்திரையானது ஒரு சலுகையெனக் குறிப்பிடத்தகுந்தமையை அடைந்துள்ளது, மற்றும் சில வேளைகளில் அவ்விதப் புனிதயாத்ரீகரைச் சந்திப்பதும் பெரும் சலுகையெனக் கருதப்படுகிறது. இச்சலுகை பொருளியல் ரீதியிலானதோ அல்லது பௌதீக ரீதியிலானதோ அல்ல, ஆனால் அதற்கு மாறாக ஆன்மீக ரீதியிலானது. கடந்தகாலங்களில் இம்மரபை தவறாகப் பயன்படுத்தியும், ஏமாந்தவர்களை ஏமாற்றுவதற்கு இதை உபயோகப்படுத்தியும், தங்கள் சாதனைகளில் ஒன்றாக அதைக் காண்பித்தும், அது அவர்களுக்கு ஏதோ ஓர் உயர்ந்த ஸ்தானத்தை அளித்துள்ளதாக எண்ணியும் செயல்பட்டும் வந்த போதிலும் அழியாமல் இம்மரபு காலங்காலமாகத் தலைத்தே வந்துள்ளது. நிச்சயமாகவே, இது குறித்த தெளிவற்ற நோக்கங்களும், “புறப்பயணம்” மற்றும் “அகவரவு” ஆகியவற்றுக்கிடையிலான குழப்பங்களும் கடந்த காலங்களில் மாபெரும் இலக்கியப் படைப்புக்களைத் தூண்டியுள்ளன. புனிதப்பயணமென்பது தனிப்பட்ட வகையில் ஆசீர்வாதத்தின் ஓர் அடையாளமாகவே இருந்துள்ளது, மற்றும் அதை அடைவது ஆன்மீக வாழ்வின் ஒரு குறிக்கோளாகவும், மறுஅர்ப்பணிப்பின் ஓர் அறிகுறியாகவும் இருந்துள்ளது. புனிதப்பயணமெனும் கடுமையான பாதை பாவம் தீர்க்கும் ஒரு வழியாகவும் பயன்பட்டுள்ளது, மற்றும் மனதில் பெரிதும் ஐயம் கொண்ட யாத்ரீகரும் தனது இதய ஆவலின் திருவாசலில் தனக்கென வெகுமதிகளை இரகசியமாக எதிர்பார்ப்பார்.

பஹாய் சமயத்தில், ஒரு குறிப்பிட்ட வித்தியாசத்தைத் தவிர்த்து இம்மரபு முழுமையாக பின்பற்றப்படுகின்றது: பெண்கள் இதிலிருந்து விதிவிலக்களிக்கப்பட்டடுள்ளனர். இத்தனியொரு விதிவிலக்கு இம்மரபு குறித்தும், கடந்த மற்றும் வருங்காலங்கள் குறித்தும், பெண்கள் குறித்தும், மற்றும் வார்த்தைகளின் பயன்கள் குறித்தும் பல கேள்விகளை எழுப்புகின்றது. புனிதப்பயணத்திலிருந்து ஒருவர் எவ்வாறு “விதிவிலக்களிக்கப்படலாம்”? போவதற்கோ அல்லது போகாமல் இருப்பதற்கோ ஒருவருக்கு வாய்ப்பளிக்கப்படலாம். இக்கடமையை ஆற்றுவதிலிருந்து ஒருவர் நிச்சயமாக விடுவிக்கப்படலாம். ஆனால் ஒரு சலுகையிலிருந்து ஒருவர் எவ்வாறு “விதிவிலக்குப்” பெறுவது? புனிதயாத்திரை கலந்துரையாடல் குறித்த எழுவாயாகவும் “விதிவிலக்கு” வினைச் சொல்லாகவும் இருக்கும் வரையில் இது எனக்குப் புரியப்போவதில்லை.

ஆகாயப் பயணம், மருத்துவ வசதிகள், ஆரோக்கியமான உடல், மற்றும் சுமாரான சுதந்திரம் பெற்ற இருபதாம் நூற்றாண்டில் வாழும், முக்கியமாக மேற்கு நாடுகளில் வதியும் பெண்கள் இச்சந்தேகத்திற்குறிய சிறப்பிற்காக தனிப்படுத்தப்பட்டிருப்பது குறித்து ஆச்சர்யப்படலாம். தவிர்ப்பதைவிட மாறுவதே சிறப்பாகும் எனக்கூடிய சூழ்நிலை மற்றும் இருப்புநிலைகளைக் குறிக்கும் ஒரு விதிவிலக்கை அவர்கள் எவ்வாறு கருதுவது என்பது குறித்து ஆச்சர்யப்படலாம்.

தாங்கள் பெண்கள் என்பதைத் தவிர்த்து வேறு காரணங்களுக்காகவும் அவர்கள் இச் சலுகையைப் பயன்படுத்தக்கூடிய சூழ்நிலை உருவாகுவது குறித்தும் இப்பயணம் பெண்களுக்குக் கட்டாயமானதல்ல எனும் காரணத்தினால் ஆண்கள் அவர்கள் அப்பயணத்தில் ஈடுபடுவதினின்று அவர்கள் மனதை மாற்ற முயற்சிக்கலாம் என்பது குறித்தும் பெண்கள் யோசிக்கலாம். தேக அசௌகர்யத்தினாலோ, பொருளாதார சிறமங்களினாலோ இச்சலுகையைப் பெறவேண்டிய நிலையில் பெண்களல்லாதவரும் இருப்பார்கள் எனும் அதே வேளையில் பெண்கள் எனும் காரணத்தினால் தங்களுக்குத் தேவைப்படாத ஒரு சலுகையைப் பெற்றிருப்பது குறித்தும் அவர்கள் குழப்பமடையலாம் யாவற்றுக்கும் மேலாக, மனுக்குல முழுமைக்குமான ஆசிகள் குறித்த விளைவுகளைத் தாங்கி வரும், பல நூற்றாண்டுகளாக இருந்துள்ள வழக்கமான ஒன்றை, நமது சமயத்திலிருந்தும் கிரகிக்கக்கூடியதுமான ஒரு செயலை ஆற்றுவதிலிருந்து நமது பெண்கள் விலக்களிக்கப்பட்டுள்ளது பற்றி அவர்கள் குழப்பமடையலாம்.

விதிவிலக்கு மற்றும் தடைவிதிப்பு ஆகியவற்றுக்கிடையில் சுலபத்தில் ஏற்படக்கூடிய நிலைச்சறுக்கல் குறித்தும் அவர்கள் சிந்தனை செய்யலாம். யாவற்றையும் விட, ஓர் ஆன்மீக அதிகாரி ஒரு சாரருக்கு சிறப்பு விதிகள் விதித்திடும் போது இந்நிலைச்சறுக்கல் நிகழ்ந்திட வாய்ப்புள்ளது என்பதைச் சோர்ந்த உள்ளத்துடனும், சரிந்திடும் எதிர்பார்ப்புகளுடனும் அவர்கள் நினைத்துப்பார்ப்பார்கள்; அதாவது, சமயம் ஒரு சாரரை மட்டும் தனிப்படுத்தும் விதிவிலக்கை அளிக்கும் போது இந்நிலைச்சறுக்கல் நிகழக்கூடும், அதாவது சமூகத்தின் குறிப்பிட்ட உறுப்பினர்களாகிய, குறிப்பாக பெண்களிடையே சில சிரமங்களை நீக்கிடும் பொருட்டு மனித அலுவல்களை இறைவன் ஒழுங்குபடுத்த முனையும் போது இது நிகழக்கூடும். பொதுவாக என்ன நடக்கின்றதென்றால், ஒரு விதிவிலக்கை மனிதர்கள் தடைவிதிப்பாக மாற்றிடும் போது ஒரு நிலைச்சறுக்கல் ஏற்படுகின்றது, நிதானமான, கண்ணுக்குத்தெரியாத நிலைச்சறுக்கல் இது. இது ஒரு குற்றச்சாட்டல்ல, கண்டணமும் அல்ல. ஆறாயிர வருடப் ப ழக்கம் சுலபத்தில் நீங்காது. அது உடலோடு ஒட்டியது, அது சமூகங்களைப் பிணைத்திடும், எண்ணிக்கையற்ற நுண்ணிய சேர்க்கை இழைகள் மற்றும் எதிர்பார்ப்புக்கள் என்பதும் ஒன்று. அது குறித்து நாம் ஒன்றும் செய்யவியலாது, ஆனால் அதை நாம் கண்டும்காணாமல் இருக்கக்கூடாது. கண்டும்காணாமல் இருப்பது அதே சரித்திரத்தை மறுபடியும் எழுதியும் உண்மையை மறுப்பதும் ஆகும். அதே சரித்திரத்தை மறுபடியும் எழுதிட வழிகள் நிச்சயமாக உண்டு. மனித இயல்பின் இருள்சார்ந்த பக்கத்தைப் பற்றி சிந்திக்காமல் இருப்பதற்காக சலுகைளிலிருந்து பெறப்படும் விதிவிலக்கை அதே சலுகைகள் எனும் கோணத்திலிருந்து மறுவரையறுக்கும் வழிகள் உண்டு. இது சிறமமானதல்ல. பல நூற்றாண்டுகளாக கத்தோலிக்க மகாசபை இதைச் செய்துள்ளது. பல விதமான கொடுமைகளை இதே விதத்தில்தான் ஃபாசிஸ்ட் சர்வாதிகார சமூகங்கள் நியாயப்படுத்தி வந்துள்ளன. சர்வாதிகார ஆட்சிகள் இதை “மறுகல்வி புகட்டுதல்” எனக் கூறின.
தேவைப்படுவதெல்லாம் சிறிது புத்தி சாதுர்யமே:

– நீண்ட பயணங்களுக்குத் தேவைப்படும் வலிமையைக் குறைக்கும் கடினங்களையும் இடைவிடாத மனோபாரங்களையும் தாங்கிடுவதற்கு ஆண்களைவிட பெண்களே அதிக இயற்சக்திகள் பெற்றுள்ளனர் எனும் விஞ்ஞான ரீதியான சமீப கால ஆய்வுகளை நாம் உணர மறுத்தும் கடந்த நூற்றாண்டு முதல் சகிப்புத்தன்மை குறித்த சாதனைகள் அனைத்தையும் முறியடித்துள்ள குறிப்பிடத்தகுந்த பெண் பயணிகள் பற்றிய குறிப்புகள் யாவற்றையும் புறக்கனிப்பது;
விளையாட்டு மைதானத்தில் கடுமையான துன்பங்களுக்குள்ளாகியும், மனித உள்ளம் எய்திட நினைக்கும் நித்தியமான இல்லம் நோக்கிய பிரயாணத்தின்போது எதிர்நோக்கக்கூடிய எந்தச் சிரமங்களுக்கும் இணையாகாத, தங்கள் இல்லங்களில் எவ்வித வெகுமதிகளும் இல்லாமல் தாங்கள் எதிர்நோக்கும் பெரும் சிரமங்களுக்குள்ளாகும் உலகப் பெண்களின் உடல் மற்றும் மனோ வலிமையை நாம் புறக்கனிப்பது;

– மனம்வெதும்பியும், உறங்கிக்கொண்டும், அதிகமாக சாப்பிட்டு உடலை பருமனாக்கிக்கொண்டும், அல்லது நன்கு உணவு உட்கொள்ளாமல், தங்கள் உடையலங்காரங்களில் மூழ்கியும், கனவுலகில் சஞ்சரித்தும், சுறுக்கமாகச் சொல்லப்போனால் இந்த மாதிரியெல்லாம் தங்களைப் பலவீனர்களாக மாற்றிக்கொள்ளாமல், அனுமதிக்கப்பட்ட வரை ஆண்களைப் போலவே பெண்கள் ஓடியும், குதித்தும், பிரயாணங்களுக்கான வலிமையில் ஆண்களுக்கீடான வலிமையோடு ஒப்பிடுகையில் அனுவளவும் குறைவேற்படுத்தாத எந்தவொரு உயிரியல் குறைபாடுகளையும் பெண்கள் அநுபவிக்கவில்லையென்பது;

– தங்கள் இல்லங்களிலேயே அடங்கிக் கிடந்து, சிக்கனமாக செலவுகள் செய்தும், தங்கள் கற்புக்குக் கலங்கமில்லாமல் தேசாடணம் செய்யவோ அல்லது அறிமுகமில்லாதவர்களை உபசரிக்கவோ விடாத, ஒவ்வொரு மூலை முடுக்குகளிலும் தங்கள் கற்புக்குக் களங்கம் விளைவிப்போரை உருவாக்கிய ஆணாதிக்கத்தினால் உருவாக்கப்பட்ட பயம், தங்கள் உடல்கள் அகன்றுள்ளதைப்போன்றே, அகன்றுள்ள பெண்களின் மனங்களை மீண்டும் அந்த ஆதி மற்றும் பூர்வநிலை இருளில் இட்டு அடக்குவதை நாம் நிச்சயிப்பது;

– இறுதியாக, தனது பூர்வத்தூய்மையிலிருந்து கனிந்து பஹாய் புனித யாத்திரை கூட ஒருநாள் கடந்த காலங்களைப் போல் புனிதம் சிதைந்துவிடும் எனவும், ஆண்களைவிட பெண்களுக்கு மிகவும் கடுமையாக விளங்கக்கூடியதும் வலிமையைச் சோதிக்கும் ஒன்றாகவும் அது ஆகும் எனவும், வருடா வருடம் லட்சோபலட்ச மக்கள் ஆற்றும் புனிதப்பயணங்களிலிருந்து தோன்றும் குறைபாடுகளை, லௌகீக ஈடுபாடுகளை, மூட நம்பிக்கைகளை, வெறுப்பேற்படுத்தக்கூடிய நடத்தைகளை உலக நீதி மன்றத்தால் கூட ஒன்றும் செய்ய முடியாது போகும் என நாம் எண்ணினோமானால்:

அதற்கான பதில் ஆமாம் எனவே வரும். பெண்கள் புனிதஸ்தலங்களை நேரடியல்லாத காட்சிகளாக காணவே விரும்புவார்கள், மற்றும், ஆமாம், பௌதீகப் பிரயாணத்திலிருந்து கிடைக்கும் விதிவிலக்கானது உண்மையிலேயே ஒரு சலுகையாகிவிடும். ஆனால் இதைத்தானே நாம் நிலைச்சறுக்கல் எனக் கூறுகின்றோம். இதுதானே எதையும் ஓய்வில்லாமல் நியாயப்படுத்தும் மனதிலிருந்து தோன்றும் பின்விளைவுகள் எனப்படுகின்றது. அர்த்தங்களைத் தேடும்போதும், கற்பனா பின்விளைவுகளை அனுமானம் செய்தும், நினைத்தும், கண்டுபிடிக்கவும் ஆரம்பித்தோமானால் பெரும் பயங்கரங்களை நாம் வெளிக்கொணருவோம். இவ்வித நிலைச்சறுக்கல் குறித்து சமூகம் பெரிதும் எதிர்ப்பு தெரிவியாமல் இருக்கும் வரை, எல்லா சட்டங்களும், விதிமுறைகளும் இவ்வித துர் உபயோகத்தை முற்றாக தடுக்காதவரை, பெண்களுக்கான விதிவிலக்குகள் அவர்களுக்கு எதிராக பயன்படுத்தப்படுவதிலிருந்து இறைவன் தாமே, பெண்களை பாதுகாக்கும் வரை, இவ்வித கொடுமைகள் மீண்டும் மீண்டும் நடக்கவே செய்யும்.

Read Full Post »